صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: سوديك حققت أعلى أرباح في تاريخها بقيمة ٤.٥ مليار جنيه، ومصرف أبوظبي الإسلامي أرباحه زادت ٤٠٪، والقناة للتوكيلات الملاحية سجلت نمو ١٢٪؛ أما الدلتا للسكر فاتحولت للخسارة بسبب المنافسة في السوق..

مؤشر إي جي إكس ٣٠ ارتفع بنسبة ٠٫٦٠٪ وقفَل عند ٥٠٬٠٣٥ نقطة، مؤشر إي جي إكس ٧٠ ارتفع بنسبة ٠٫٨٢٪ وقفَل عند ١٢٬٨٧٤ نقطة، ومؤشر إي جي إكس ١٠٠ ارتفع بنسبة ١٫٠١٪ وقفَل عند ١٧٬٨٤٠ نقطة

قيمة التداول وصلت لـ٧٫٩ مليار جنيه، من خلال ١٩١٬٨٠٢ عملية على حوالي ٢٬٠٩٦٬١٧٧٬٢٦٦ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: مصر الجديدة للاسكان والتعمير (+٨٫٤٪)، فالمور القابضة (+٨٫١٪)، وإيديتا (+٧٫٣٪)

أما الخسرانة: برايم القابضة (-٨٫١٣٪)، النصر لتصنيع الحاصلات الزراعية (-٤٫٢١٪)، وجي بي كورب (-٣٫٥٪)

بالنسبة لمؤشر إي جي إكس ٣٠: أبرز الكسبانة كانت مصر الجديدة للاسكان والتعمير (+٨٫٤٪)، فالمور القابضة (+٨٫١٪)، وإيديتا (+٧٫٣٪)

أما الخسرانة: جي بي كورب (-٣٫٥٪)، الشرقية للدخان (-٣٫١٪)، وقلعة القابضة (-١٫٧٪)

إحصائيات مهمة تانية

سعر جرام الذهب عيار ٢٤ وصل لـ٧٬٧١١ جنيه، مرتفع يوميًا بنسبة ١٫١٣٪ ومرتفع شهريًا بنسبة ٪١٢٫٢٩

الدولار وصل لـ٤٦٫٩١ جنيه في البنك الأهلي المصري

١- سوديك حققت أعلى أرباح في تاريخها في ٢٠٢٥ بصافي ٤.٥ مليار جنيه، وده حصل نتيجة زيادة الإيرادات وتضاعف عدد الوحدات اللي سلموها للعملاء رغم ظروف السوق الصعبة. (اقرا أكتر في قسم نظرة معمقة)

٢- مصرف أبوظبي الإسلامي حقق أداء قوي في ٢٠٢٥، وصافي أرباحه وصل لـ ١٢.٦ مليار جنيه مقارنة بـ ٩ مليار السنة اللي قبلها. النمو ده كان مسنود بزيادة واضحة في صافي الدخل من العائد اللي سجل ٢٠.١٥ مليار جنيه مقابل ١٥.٢٥ مليار في ٢٠٢٤. سهم الشركة سجل نمو بنسبة ٥٠.٩٪ في ٢٠٢٥، ومكمل أداءه القوي من أول السنة دي بزيادة ٪٣١.٣٧

٣-شركة القناة للتوكيلات الملاحية أرباحها زادت بنسبة ١٢٪ وسجلت مليار جنيه في النص الأول من السنة المالية. التحسن ده سببه الرئيسي نمو الإيرادات اللي وصلت لـ ٨١.٢٢ مليون جنيه، مقارنة بـ ٦٢.٠١ مليون جنيه في نفس الفترة من السنة اللي فاتت. قيمة السهم زادت بنسبة تقرب من ٣٨٪ خلال السنة اللي فاتت

٤- شركة الدلتا للسكر اتحولت للخسارة وسجلت صافي خسائر بقيمة ٣٤٦.٣٦ مليون جنيه في ٢٠٢٥، وده تحول حاد مقارنة بأرباح السنة اللي قبلها اللي سجلت ١.٢٦ مليار جنيه، رغم إن الإيرادات قفزت لـ ٧.٧٧ مليار جنيه مقارنة بـ ٤.٧ مليار جنيه. الشركة رجعت السبب في الخسارة دي لانخفاض أسعار البيع في السوق نتيجة دخول كميات سكر مستورد رخيص، ده غير ارتفاع تكلفة المواد الخام اللي أجبرت الشركة تعمل تخفيض لقيمة المخزون. وبالنسبة لأداء السهم، فالسعر فضل ثابت ومتحركش تقريبًا خلال السنة اللي فاتت

حققت شركة سوديك صافي ربح قياسي وصل لـ ٤.٥ مليار جنيه في ٢٠٢٥، بزيادة ٧٧٪ على أساس سنوي، وده بحسب آخر قوائم مالية للشركة. القفزة دي كانت مدعومة بنمو كبير في الإيرادات بنسبة ١١٨٪ عشان توصل لـ ٢١.٣ مليار جنيه

زيادة في عدد الوحدات المباعة وتراجع طفيف في قيمة المبيعات التعاقدية

الشركة باعت ١٧٨٨ وحدة خلال السنة اللي فاتت، زيادة عن ١٢٧٠ وحدة في ٢٠٢٤. ورغم إن الأسعار زادت بنسب بين ١٠٪ و٣٠٪ في كل المشروعات، إلا إن قيمة المبيعات التعاقدية تراجعت تراجع بسيط وسجلت ٤٨.٤ مليار جنيه مقارنة بـ ٥٠.٣ مليار جنيه السنة اللي قبلها، وده بيعكس تغير في مزيج البيع

مبيعات ٢٠٢٥ كانت متركزة بشكل أساسي في مشروع "إيست فيل" في شرق القاهرة، واللي شهد بيع عدد أكبر من الوحدات بمساحات أصغر وأسعار أقل نسبيًا

تسريع وتيرة التسليمات رغم تحديات السوق

سوديك قدرت تضاعف تسليمات الوحدات في ٢٠٢٥ عشان توصل لـ ٢٠٨٩ وحدة. أيمن عامر، المدير العام للشركة، قال لـ "الشرق" إن ده حصل بفضل استراتيجية ساعدت في استكمال المشروعات رغم التوترات الجيوسياسية ونقص بعض مواد البنا. والشركة بتستهدف تسليم أكثر من ٢٠٠٠ وحدة سكنية السنة دي في الساحل الشمالي وغرب القاهرة

توسعات في قطاع الفنادق والضيافة

وحسب تصريحات عامر، الشركة بتجهز للتوسع في قطاع الضيافة، وبتخطط لافتتاح فندقين بنهاية السنة دي وبداية ٢٠٢٧. المشروعات دي بتشمل فندق "تريبيوت بورتفوليو" بسعة ١٧٠ غرفة في غرب القاهرة بالشراكة مع "ماريوت الدولية"، وفندق "نوبو" الفاخر بسعة ٥٠ غرفة في شرق القاهرة، ده غير اتفاقيات تانية لتطوير ٣ فنادق ومطاعم وشقق فندقية تابعة لعلامة نوبو