صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: بالم هيلز والشركة المصرية الكويتية اطلقوا مشروع ضخم في غرب القاهرة، وإي فاينانس بتخطط لاستحواذ جديد، وفي نفس الوقت بي إنفستمنتس بدأت في إجراءات طرح جورميه، ومدينة مصر وسييرا وقعوا شراكات استراتيجية جديدة

مؤشر إي جي إكس ٣٠ ارتفع بنسبة ٠٫٦٥٪ وقفَل عند مستوى قياسي جديد ٤٣٬٦٨٤ نقطة، مؤشر إي جي إكس ٧٠ نزل بنسبة ١٫٣٦٪ وقفَل عند ١٢٬٧٠٧ نقطة، ومؤشر إي جي إكس ١٠٠ نزل بنسبة ١٫٤٥٪ وقفَل عند ١٧٬٠٠٤ نقطة

قيمة التداول وصلت لـ٥٫٧٥ مليار جنيه، من خلال ١٣٦٬٩٤٥ عملية على حوالي ١٬٥٢٦٬٤٧٩٬٤٩١ سهم

المستثمرين الدوليين كانوا الوحيدين اللي سجلوا صافي شراء

أبرز الأسهم الكسبانة في السوق كله: شمال الصعيد للتنمية والإنتاج الزراعي (+٤٫٧٢٪)، البنك التجاري الدولي (+٤٫٥٪)، وبرايم القابضة (+٣٫٥٪)

أما الخسرانة: إم. بي للهندسة (-٨٫١٠٪)،السعودية المصرية للاستثمار والتمويل(-٧٫٤٨٪)، ورواد السياحة (-٦٫٦٥٪)

بالنسبة لمؤشر إي جي إكس ٣٠: أبرز الكسبانة كانت البنك التجاري الدولي (+٤٫٥٪)، جي بي كورب (+٣٫٣٪)، ومجموعة طلعت مصطفى القابضة (+٠٫٩٪)

أما الخسرانة: القلعة للاستثمارات المالية (-٥٫٩٪)، إي فاينانس (-٥٫٠٪)، وموبكو (-٤٫٥٪)

إحصائيات مهمة تانية

سعر جرام الذهب عيار ٢٤ وصل لـ٧٬٠١٩ جنيه، مرتفع يوميًا بنسبة ٠٫٦٧٪ ومرتفع شهريًا بنسبة ٪٦٫٤٨

الدولار وصل لـ٤٧٫١ جنيه في البنك الأهلي المصري

١- شركة بالم هيلز دخلت في شراكة مع الشركة المصرية الكويتية عشان يطوروا مشروع سكني على مساحة ١.٤ مليون متر مربع في غرب القاهرة، وده هيكون جنب مشروع بالم هيلز في ٦ أكتوبر الحالي. (اقرا أكتر في قسم نظرة معمقة)

٢- شركة إي فاينانس بدأت إجراءات الاستحواذ بالكامل على شركة في قطاع الخدمات المالية غير المصرفية، وخدت بالفعل الموافقة من كبار المساهمين في الشركة دي. حالياً إي فاينانس مستنية موافقة الرقابة المالية عشان تبدأ مرحلة الفحص النافي للجهالة

٣- مجلس إدارة شركة بي إنفستمنتس وافق رسمياً على الطرح العام الأولي لشركة جورميه التابعة ليها في قطاع التجزئة والأغذية. الخطوة دي جت بعد تقديم طلبات للرقابة المالية تمهيداً لإدراج سلسلة السوبر ماركت الشهيرة في البورصة المصرية.

٤- شركة مدينة مصر وقعت مذكرة تفاهم بقيمة ٤٠٠ مليون جنيه مع شركة السويدي إليكتريك للبنية التحتية عشان ينفذوا شبكات مرافق متطورة لمشروع "إيلان" ضمن مشروع "سراي" بتاع  مدينة مصر في شرق القاهرة . الشراكة هدفها تسريع معدلات الإنشاء، ومن المفترض إن أعمال البنية التحتية تخلص في نهاية ٢٠٢٧

٥- شركة  سيرا وجامعات بدر عملوا شراكة استراتيجية مع جامعة أونتاريو الكندية عشان يقدموا برامج ماجستير معتمدة دولياً في مصر. التعاون ده هيبدأ في جامعات بدر وهيقدم تخصصات هندسية متطورة زي الميكاترونيكس، والبرمجيات، وهندسة السيارات، والهندسة النووية

١- الحكومة بتستعد ترجع برنامج الطروحات الحكومية تاني وبتستهدف تجمع ٦ مليار دولار، بحسب تصريحات مسؤول حكومي لـ انتربرايز. البداية هتكون من شهر فبراير الجاي بطرح حصص في شركتين على الأقل في البورصة، ومن المتوقع إن شركات حكومية زي "وطنية" و"شيل أوت" و"صافي" يكونوا في مقدمة الشركات اللي هيتم طرحها

٢- الاتحاد الأوروبي هيبعت لمصر مليار يورو يوم الخميس الجاي، ودي الدفعة التانية من حزمة دعم قيمتها ٥ مليار يورو، بحسب كلام وزيرة التخطيط رانيا المشاط. ومصر نفذت بالفعل ٣٨ إجراء إصلاحي عشان تستلم المبلغ ده، بس لسه فاضل ١٠٠ خطوة تانية لازم تخلص عشان ناخد الـ ٣ مليار يورو اللي فاضلين، والمتوقع إنهم يوصلوا على دفعتين خلال ٢٠٢٦

شركة بالم هيلز  اتفقت مع الشركة المصرية الكويتية للتنمية العقارية عشان يطوروا مشروع سكني جديد على مساحة ١٫٤ مليون متر مربع في غرب القاهرة، والمشروع هيكون جنب مشروعها الحالي في ٦ أكتوبر

التفاصيل

المشروع ده مخطط يطرحوه في النص الأول من ٢٠٢٦، ومتوقع يحقق مبيعات بتوصل لـ ١٧٧ مليار جنيه، وده هيخلي إجمالي محفظة الأراضي اللي بتمتلكها الشركة يوصل لحوالي ٤٠٫٥ مليون متر مربع

للتذكير، الشركة بتتوسع في الخليج ومحليًا

لشهر اللي فات، بالم هيلز أعلنت دخولها سوق الإمارات لأول مرة بمشروع "سعديات شورز" في أبوظبي، وده مشروع تكلفته الإنشائية بتقدر بـ ٥٫٤ مليار دولار. رئيس مجلس الإدارة ياسين منصور قال لرويترز إنهم بيستهدفوا مبيعات بأكتر من ٧ مليار دولار، وعينهم على جذب مشترين من أوروبا، وأمريكا، ومصر، وآسيا

ومش بس "سعديات"، الشركة بتخطط لمشاريع تانية في أبوظبي ودبي، ده غير نيتهم انهم يدخلوا السعودية في الرياض وجدة، ومعاهم كمان مشروع جديد هيتطرح في العاصمة الإدارية الجديدة في مصر

التوسعات دي جاية بعد نتايج مالية قوية في أول ٩ شهور من ٢٠٢٥

أرباح بالم هيلز زادت بنسبة ٥٠٪ عشان توصل لـ ٣٫٥ مليار جنيه، وإيراداتها طلعت ٤٢٪ وسجلت ٢٥٫٤ مليار جنيه بسبب المبيعات القوية. وفي الربع التالت بس، صافي الربح قفز بنسبة ٩٣٪ ووصل لـ ١٫١ مليار جنيه

خلصنا جولتنا في السوق النهارده

استنوا التحديثات الجديدة بكرة