النهاردة: معانا أحدث نتائج مالية لشركات فالمور القابضة، وفوري، وأموك، وإيه كابيتال القابضة، وشركات تانية كببرة مدرجة في البورصة المصرية. وكمان معانا آخر تطورات شركة راية القابضة، واللي قربت من خطوة بيع حصتها في شركتها التابعة للنقل واللوجستيات "أسطول"، ده غير أخبار الطروحات الجديدة لشركة قرّة إنرجي وشركة المقاولات المملوكة للدولة "مختار إبراهيم". يلا ندخل في التفاصيل

مؤشر إي جي إكس ٣٠ نزل بنسبة ١٫٥٪ وقفَل عند ٥٢٣٦٤ نقطة، في حين إن مؤشر إي جي إكس ٧٠ نزل بنسبة ١٫٣٪ وقفَل عند ١٤٨٩٢ نقطة، ومؤشر إي جي إكس ١٠٠ كمان تراجع بنسبة ١٫٣٪ وقفَل عند ٢٠٧١٥ نقطة

قيمة التداول وصلت لـ ١٠٫٩٩١ مليار جنيه، من خلال ٢٦١٬١٧٢ عملية على حوالي ٢٬٧٣٦٬٦٦٥٬٨٤٥ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: مصر للاسواق الحرة (+٢٠٫٠٪)، المصرية للمنتجعات السياحية (+١١٫٩٪)، كوبر للاستثمار التجارى و التطوير العقارى (+٩٫١٪)

أما الخسرانة: جي بي كورب (-٥٫٨٪)، جوجرين للاستثمار الزراعي (-٥٫٧٪)، ومصرف أبو ظبي الإسلامي - (-٥٫٥٪)

بالنسبة لمؤشر إي جي إكس ٣٠: أبرز الكسبانة كانت القلعة (+٦٫٥٪)، أموك (+٤٫١٪)، وأبو قير للأسمدة (+٢٫٨٪)

أما الخسرانة: جي بي كورب (-٥٫٨٪)، مصرف أبو ظبي الإسلامي (-٥٫٥٪)، والعربية للأسمنت (-٣٫٩٪)

إحصائيات مهمة تانية

سعر جرام الدهب عيار ٢٤ وصل لـ ٧٨٧٣ جنيه، منخفض بنسبة ١٫٤٪ يوميًا ومنخفض بنسبة ٢٫٥٪ شهريًا

الدولار كان بيتداول عند ٥٣٫٢٥ جنيه في البنك الأهلي المصري

أعلنت شركة فالمور القابضة (المعروفة سابقاً باسم المصرية الكويتية القابضة)، عن تحقيق صافي ربح مجمع قيمته ٤١.٦ مليون دولار في الربع الأول من سنة ٢٠٢٦، وده بيسجل زيادة بنسبة ٥٪ على أساس سنوي، بحسب أحدث بيان لنتائج أعمالها

في الربع الأول من سنة ٢٠٢٦، الإيرادات وصلت لـ ١٦٦.٣ مليون دولار، بتراجع بنسبة ١٪ على أساس سنوي مقارنة بـ ١٦٧.٣ مليون دولار في الربع الأول من سنة ٢٠٢٥

الإسكندرية للأسمدة: حققت إيرادات بقيمة ٧٧.٣ مليون دولار (بزيادة ١٦٪ على أساس سنوي)، بدعم من ارتفاع متوسط أسعار تصدير اليوريا اللي زادت بنسبة ١٥٪ على أساس سنوي

سبريا مصر (البتروكيماويات): سجلت ٣١.٢ مليون دولار (بتراجع ٣٥٪ على أساس سنوي)، وده بيعكس انخفاض أحجام المبيعات بسبب هدوء الطلب المحلي وتأثر الوصول لبعض أسواق التصدير الرئيسية في الخليج

نات إنرجي (المرافق): حققت ٢١.٠ مليون دولار(بزيادة ٢٠٪ على أساس سنوي)، بدعم من نمو قاعدة التوصيلات النشطة وزيادة كميات توزيع الغاز

شمال سيناء البحرية: سجلت ١٥.٠ مليون دولار (بزيادة ٤٪ على أساس سنوي)، مدعومة باستقرار الإنتاج من الآبار اللي دخلت الخدمة قريب

كهربا (المرافق): حققت ١٦.٣ مليون دولار (بزيادة ٢١٪ على أساس سنوي)، بفضل النمو القوي في كميات توزيع الكهرباء

الخدمات المالية غير المصرفية والقطاعات الأخرى: ساهمت بـ ٥.٥٨ مليون دولار في إيرادات الربع الأول من ٢٠٢٦

فالمور ماشية في خطوات نشر رأس المال في مشروع "إندوليس"، وهو مصنع إعادة تدوير البلاستيك في المملكة المتحدة، والمتوقع بدء تشغيله في الربع الرابع من سنة ٢٠٢٦. وكمان شركة "إيكاكوم"، وهي أول استثمار ليها في السعودية، بتواصل التوسع في عمليات شبكة توزيع الغاز الطبيعي في المدينة الصناعية الثالثة بالدمام. الاستراتيجية دي بتيجي بعد خطوات تحسين محفظة الاستثمارات الأخيرة، واللي شملت بيع كامل حصتها في شركة دلتا للتأمين المقيدة في البورصة المصرية، والتخارج الكامل من شركة "شيلد غاز"

الإدارة أكدت تاني على "رؤية ٢٠٣٠" لتحويل فالمور لمنصة استثمار عالمية، بتعتمد في أغلبية إيراداتها بشكل قوي على العملات الأجنبية مع امتلاك محفظة استثمارية متنوعة. الشركة بتهدف لاقتناص الفرص في منطقة الشرق الأوسط وشمال أفريقيا وأوروبا، مع الاستمرار في التخارج من الأصول غير الرئيسية وإعادة توجيه رأس المال للاستثمارات اللي بتقدم عوائد أعلى

الشركة شهدت بداية كويسة للسنة، وسعر سهمها ارتفع بنسبة ٣٠٪ من أول سنة ٢٠٢٦. وده بيخلي قيمة السهم مرتفعة بنسبة ١٧.٨٪ مقارنة بالمستويات اللي اتسجلت من ١٢ شهر فاتوا

أعلنت شركة التكنولوجيا المالية "فوري" عن تحقيق صافي ربح بقيمة ٧٤٩.٣ مليون جنيه في الربع الأول من ٢٠٢٦، بزيادة بنسبة ٢٣.٨٪ على أساس سنوي، وده بدعم من التوسع المستمر للمنصة، وتنوع المنتجات، وزيادة تفاعل العملاء، بحسب أحدث نتائجها المالية

إجمالي الإيرادات المجمعة وصل لـ ٢.٤١ مليار جنيه، وده بيسجل زيادة بنسبة ٣٤.٣٪ مقارنة بنفس الفترة من السنة اللي فاتت. والنمو ده كان مدفوع بشكل أساسي بالتوسع القوي في قطاعات الخدمات المالية والخدمات المصرفية

الخدمات المصرفية: حققت إيرادات بقيمة ٩٢٤.١ مليون جنيه، بزيادة ٢٩.٨٪ على أساس سنوي، بدعم من التوسع في قطاعي الخدمات المصرفية للوكلاء والقبول

الخدمات المالية: سجلت إيرادات بقيمة ٨٠٠.٥ مليون جنيه، بارتفاع ٧٣.٩٪ على أساس سنوي، وده بفضل النمو في وساطة التأمين، والتمويل الاستهلاكي، وطرح منتجات البطاقات مسبقة الدفع

المدفوعات الرقمية البديلة: ساهمت بـ ٤٧٢.٤ مليون جنيه، بزيادة ٢.٣٪ على أساس سنوي، مع استمرار الشركة في توسيع منظومتها الرقمية الشاملة

حلول سلاسل الإمداد: حققت إيرادات بقيمة ١٤٥ مليون جنيه، بزيادة ١٤.٧٪ على أساس سنوي، مدعومة بزيادة رقمنة تدفقات مدفوعات الشركات لبعضها

قطاعات التكنولوجيا والقطاعات الأخرى: سجلت إيرادات بقيمة ٦٨.٧ مليون جنيه، بزيادة ١٨.٣٪ على أساس سنوي

فوري بتسرع من دخولها في مجالات التمويل المدمج وخدمات الرعاية الصحية بعد ما حصلت على الموافقة لإطلاق شركة تابعة للتأمين متناهي الصغر برأس مال ٦٠ مليون جنيه وبحصة ملكية تبلغ ٩٠٪. والشركة الجديدة دي هتقدم منتجات تأمين منخفضة التكلفة بتغطي الصحة، والحياة، والحوادث، وحماية الأصول مباشرة من خلال منصة فوري، وبتستهدف قاعدة مستخدمين بتوصل لـ ٢٤ مليون مستخدم

كمان الشركة حصلت الشهر اللي فات على تمويل بقيمة ٤.٤ مليون يورو من البنك الأوروبي لإعادة الإعمار والتنمية لدعم الشركات اللي بيدييرها الشباب ورواد الأعمال في المناطق الريفية 

وفي أول الشهر ده، فوري توسعت أكتر في قطاع الرعاية الصحية بعد ما حصلت على رخصة شركة إدارة الرعاية الصحية من خلال شركتها التابعة "تريميد"، وده بيعزز منصة "فوري للرعاية الصحية" اللي بتهدف لربط المرضى، وشركات التأمين، ومقدمي الخدمات الطبية من خلال إدارة المطالبات الرقمية، والمدفوعات، وخدمات شبكة مقدمي الرعاية

بالإضافة لده، أشرف صبري، الرئيس التنفيذي لشركة فوري ،قال امبارح إن الشركة مستنية دلوقتي الموافقة النهائية من البنك المركزي المصري لإطلاق خدمات استقبال الحوالات الخارجية، وهي خطوة هتخليها أول مؤسسة مالية غير مصرفية في البلد بتتعامل بشكل مباشر في تحويلات الأموال عابرة الحدود. والتوسع ده هيفتح لفوري الباب لدخول سوق الحوالات الخارجية المزدهر في مصر، واللي سجل رقم قياسي ووصل لـ ٤١.٥ مليار دولار السنة اللي فاتت

الشركة شهدت بداية كويسة للسنة، وسعر سهمها ارتفع بنسبة ٢١.٨٪ من أول سنة ٢٠٢٦. وده بيخلي قيمة السهم مرتفعة بنسبة ٩٣.٦٪ مقارنة بالمستويات اللي اتسجلت من ١٢ شهر فاتوا

١. حققت شركة الإسكندرية للزيوت المعدنية (أموك) بداية قوية لسنة ٢٠٢٦، بعد ما قفز صافي أرباح الربع الأول بنسبة ٣٧٪ على أساس سنوي ووصل لـ ٦٣٥.١ مليون جنيه، بحسب أحدث نتائجها المالية. وارتفعت المبيعات لتتخطى ١٠.٥ مليار جنيه مقارنة بـ ١٠.٠٦ مليار جنيه في نفس الفترة من السنة اللي فاتت. وسعر سهم الشركة ارتفع بنسبة ٢٧.١٪ من أول سنة ٢٠٢٦ بعد ما كسب ٤.١٪ بنهاية جلسة امبارح. ومقارنة بالمستويات المتسجلة من سنة فاتت، السهم مرتفع بنسبة ٪١٨.٢

٢. سجلت شركة إيه كابيتال القابضة نمو انفجاري في الربع الأول، وصعد صافي الأرباح بنسبة ١٧٤٠٪ على أساس سنوي ووصل لـ ٣٨٥.٧ مليون جنيه، بحسب أحدث نتائجها المالية. وكمان الإيرادات قفزت لـ ١.٢٢ مليار جنيه مقارنة بـ ١٨١.٥٢ مليون جنيه في نفس الفترة من السنة اللي فاتت. وقيمة سهم الشركة فضلت زي ما هي من غير تغيير مقارنة بالمستويات المسجلة في أول سنة ٢٠٢٦، وده بالرغم من صعوده بنسبة ٤.٧٪ بنهاية جلسة امبارح. ومقارنة بالمستويات المتسجلة من سنة فاتت، السهم مرتفع بنسبة ٪١٤٣.٥

٣. أعلنت شركة ابن سينا فارما عن أداء قوي في الربع الأول بعد ما صعد صافي الأرباح بنسبة ٤٠.٧٪ على أساس سنوي ووصل لـ ٢٥٥.٩ مليون جنيه، بحسب أحدث نتائجها المالية. وحققت شركة توزيع الأدوية إيرادات بقيمة ٢٠.٥ مليار جنيه خلال الربع ده، ارتفاعاً من ١٧.٠٤ مليار جنيه قبل سنة. وسعر سهم الشركة متراجع بنسبة ١.٤٪ من أول سنة ٢٠٢٦. ومقارنة بالمستويات المتسجلة من سنة فاتت، السهم مرتفع بنسبة ٪٢٠.٨

٤. أعلنت شركة ماكرو جروب للمستحضرات الطبية عن نمو قوي في الربع الأول، وصعد صافي الأرباح المجمعة بنسبة تقارب ٤٩٪ على أساس سنوي ووصل لـ ٣٣.٤ مليون جنيه، بحسب أحدث نتائجها المالية. وكمان المبيعات قفزت بنسبة ٤٧.٧٪ وسجلت ٢٧٢.٣ مليون جنيه. وسعر سهم الشركة مرتفع بنسبة ١٠.٥٪ من أول سنة ٢٠٢٦. ومقارنة بالمستويات المتسجلة من سنة فاتت، السهم مرتفع بنسبة ٪١٥٧.١

أخبار تانية برة نتائج الأعمال

٥. قربت شركة راية القابضة خطوة كمان من إنهاء خروجها من شركتها التابعة للنقل واللوجستيات "أسطول"، بعد ما وافق مجلس إدارتها على بيع حصتها البالغة ٩٠٪ لصالح شركة تابعة لمجموعة أسيك للتعدين (أسكوم) بقيمة ٦٤١ مليون جنيه. ووافق المجلس كمان على دراسة القيمة العادلة المستقلة المعتمدة من الهيئة العامة للرقابة المالية، واللي قدرت سعر سهم أسطول بحوالي ٨.٢٢ جنيه للسهم، وده يعتبر أعلى بنسبة ٣٠.٥٪ تقريباً من القيمة العادلة للشركة البالغة ٦.٣ جنيه

٦. قالت شركة حلول الطاقة "قرّة إنرجي" امبارح إن الاكتتاب للمستثمرين من المؤسسات في طرحها المرتقب بالبورصة المصرية هيبدأ رسميًا النهاردة، والشركة بتهدف لجمع مبلغ بيوصل لـ ٧٣٥ مليون جنيه من خلال بيع ١١٪ من أسهمها بسعر ٢.٩٧ جنيه للسهم الواحد. ومن المقرر إن المستثمرين الأفراد ينضموا للطرح بعد يوم واحد، وبكده هيكون الطرح ده هو ثاني إدراج لشركة من القطاع الخاص في البورصة السنة دي، وده بيدي إشارة جديدة إن الشركات لسه بتستغل أسواق الأسهم برغم تقلبات المنطقة

٧. مصر مكملة في خططها لخصخصة جزئية لشركة مختار إبراهيم بعد ما بدأت شركة المقاولات المملوكة للدولة إجراءات القيد المؤقت في البورصة المصرية الأسبوع ده، وده بيمهد الطريق لبيع محتمل لحصة بتوصل لـ ٤٥٪ من الشركة ضمن برنامج الطروحات الحكومية، بحسب ما قاله مسؤول حكومي لمنصة الشرق. وعملاق البنية التحتية ده بيدير دلوقتي محفظة أعمال تحت التنفيذ قيمتها حوالي ٢٥ مليار جنيه، أغلبها مرتبط بأسواق إقليمية بتشمل عمان وأبوظبي، وفي نفس الوقت بتستهدف الشركة التوسع أكتر في السعودية

يوتوبيا - نهاية الحق لتوزيع ٢ جنيه لكل سهم. وتاريخ التوزيع هيكون ٢١ مايو

مجموعة طلعت مصطفى - نهاية الحق لتوزيع ٠.١٥ جنيه لكل سهم. وتاريخ التوزيع هيكون ٢١ مايو

بكرة

شركة مدينة مصر للإسكان - تاريخ نهاية الحق لتوزيع ٠.١٥ جنيه لكل سهم. وتاريخ الصرف هيكون يوم ٢٤ مايو