صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: راية القابضة عيّنت مستشار مالي تمهيداً للتخارج من"راية فودز"، والعبور للاستثمار بتتوسع في الإمارات، مطاحن جنوب القاهرة بتصفي أصول بـ ٥٢ مليون جنيه، والبورصة رجّعت التداول لـ بريمييم هيلثكير بعد تغييرات في إدارتها

مؤشر إي جي إكس ٣٠ ارتفع بنسبة ١٫١٩٪ وقفَل عند مستوى قياسي جديد ٤٣٬٤٠٤ نقطة، مؤشر إي جي إكس ٧٠ نزل بنسبة ٠٫٧٤٪ وقفَل عند ١٢٬٨٨٢ نقطة، ومؤشر إي جي إكس ١٠٠ نزل بنسبة ٠٫٧٤٪ وقفَل عند ١٧٬٢٥٥ نقطة

قيمة التداول وصلت لـ٧٫٢ مليار جنيه، من خلال ١٣٧٬٧٣٠ عملية على حوالي ١٬٧١٢٬١٤١٬٩٦٧ سهم

المستثمرين المحليين كانوا الوحيدين اللي سجلوا صافي بيع

أبرز الأسهم الكسبانة في السوق كله: الإسكندرية للغزل والنسيج (+١٧٫٢٨٪)، البنك التجاري الدولي (+٦٫١٪)، والزيوت المستخلصة (+٥٫٢٪)

أما الخسرانة: كاتليست بارتنرز(-١٦٫٦٧٪)، جوجرين للاستثمار الزراعي (-٦٫٧٥٪)، والمصريه لمدينة الانتاج الاعلامى(-٥٫٩٠٪)

بالنسبة لمؤشر إي جي إكس ٣٠: أبرز الكسبانة كانت البنك التجاري الدولي (+٦٫١٪)، جي بي كورب (+٤٫٠٪)، وموبكو (+٢٫٥٪)

أما الخسرانة: مصر للالومنيوم (-٣٫٧٪)، إي إف جي (-٢٫٧٪)، المصرية للاتصالات (-٢٫٦٪)

إحصائيات مهمة تانية

سعر جرام الذهب عيار ٢٤ وصل لـ٦٬٩٧٣ جنيه، مرتفع يوميًا بنسبة ٠٫٠٢٪ ومرتفع شهريًا بنسبة %٥٫٧٩

الدولار وصل لـ٤٧٫١٢ جنيه في البنك الأهلي المصري

١- راية القابضة وافقت من حيث المبدأ على عرض هيليوس للاستثمار للاستحواذ على ١٠٠٪ من شركة راية فودز التابعة، مع تعيين شركة فاكت كمستشار مالي لتحديد القيمة العادلة، على أن تُعرض الصفقة على الجمعية العامة غير العادية بعد انتهاء المفاوضات النهائية. وفي نفس الوقت، بدأت المجموعة إجراءات تأسيس شركة «أمان للتصكيك» برأسمال ١٠ ملايين جنيه من خلال ذراعها المالي غير المصرفي «أمان القابضة»، في خطوة بتستهدف التوسع في سوق الصكوك وتعزيز أنشطتها التمويلية المتوافقة مع الشريعة الإسلامية

٢- شركة العبور للاستثمار العقاري بتكمل مشوارها في الخليج وقالت انها هتأسس شركة تابعة جديدة في الإمارات، وده بعد ما وسعت نشاطها هناك بفرع في دبي خد رخصة مقاولات في أبريل ٢٠٢٥ وفرع تاني في أبوظبي في يوليو ٢٠٢٥. التوسع ده بييجي استكمالاً لتوسعها في السعودية اللي بدأ في يونيو ٢٠٢٤ لما خدت عقد بـ ١٧٫٦ مليون ريال لمستشفى طوارئ في المدينة المنورة، وكمان شغلها كمستشار عقاري لمشروع مارينا دارين في الجبيل

٣- شركة مطاحن جنوب القاهرة والجيزة أعلنت عن بيع مطحن "بحبح" بـ ١٧٫٠٩ مليون جنيه، كجزء من عملية تصفية لأصول غير مستغلة وصلت قيمتها الإجمالية لأكتر من ٥٢ مليون جنيه. التطور ده بييجي بعد ما الشركة قدرت تتحول للربحية وتحقق صافي ربح ٢٠٫٦ مليون جنيه في أول ٥ شهور من السنة المالية الحالية، بعد ما كانت محققة خسائر في نفس الفترة السنة اللي فاتت

٤- البورصة رجّعت التداول على أسهم "بريمييم هيلثكير" بعد ما الشركة أعلنت عن إعادة هيكلة شاملة في إدارتها وتعيين الدكتور بيشوي صفوت نائب رئيس وعضو منتدب جديد بصلاحيات كاملة. التغيير ده جه عشان يضمن استقرار الإدارة وتسيير الشغل بعد ما القيادات القديمة مابقتش قادرة تباشر مهامها التنفيذية، فتم تحويلهم لأعضاء غير تنفيذيين

١- شركة إيني ناوية تحفر بئرين في حقل دنيس، لإضافة ٢٠٠ مليون قدم مكعب غاز يومياً، وكمان استثمار قريب من ٢ مليار دولار في إنشاء محطة لمعالجة الغاز، حسب مسؤول حكومي اتكلم مع "الشرق". شل، بي بي، وأباتشي كمان هيرفعوا الإنتاج—شل ١٠٠ مليون قدم مكعب يومياً، بي بي ١٠٠ مليون قدم مكعب يومياً، وأباتشي ٤٠ مليون قدم مكعب يومياً باستثمارات ١٥٠ مليون دولار—حسب مصادر حكومية لـ"الشرق". الخطوات دي هدفها تقلل الفجوة بين إنتاج مصر الحالي البالغ ٤٫٢ مليار قدم مكعب يومياً والطلب اللي حوالي ٦٫٢ مليار قدم مكعب، في الوقت اللي استيراد الغاز المسال مستمر لتغطية النقص

٢- الحكومة رفعت مستهدف النمو الاقتصادي لـ٧٫٥٪ بحلول ٢٠٣٠ بدل من ٧٪، حسب النسخة المحدثة من خطة التنمية. الخطة معتمدة بشكل أساسي على القطاع الخاص، اللي مفروض يشكل ٧٢٪ من إجمالي الاستثمارات، وهو ما يتطلب تضاعف الاستثمارات الخاصة تقريبًا خلال خمس سنين. كمان الدولة بترفع سقف طموحاتها لجذب استثمارات أجنبية بـ٢٤٫٦ مليار دولار سنويًا وزيادة الصادرات لـ١٤٥ مليار دولار، مع التركيز على أفريقيا ومصادر تمويل بديلة زي دول بريكس

استنوا التحديثات الجديدة بكرة