صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: الحكومة بتخطط لحوافز ضريبية لزيادة السيولة في البورصة، جي بي كورب أنهت توريق قياسي بقيمة ٤٫١٦ مليار جنيه، جورميه فودز في طريقها للطرح العام، وتداول سهم بريميم هيلثكير لسه واقف لحد ما الشركة تقدم إفصاحاتها

مؤشر إي جي إكس ٣٠ ارتفع بنسبة ٢٫٤٨٪ وقفَل عند مستوى قياسي جديد ٤٢٬٨٩٥ نقطة، مؤشر إي جي إكس ٧٠ ارتفع بنسبة ٠٫٢٨٪ وقفَل عند ١٢٬٩٧٨ نقطة، ومؤشر إي جي إكس ١٠٠ ارتفع بنسبة ٠٫٩٠٪ وقفَل عند ١٧٬٣٧٣ نقطة

قيمة التداول وصلت لـ٥٫٨ مليار جنيه، من خلال ١٣٦٬٧٠٨ عملية على حوالي ١٬٧٢٦٬٦٩٨٬٨٥٤ سهم

المستثمرين المحليين كانوا الوحيدين اللي سجلوا صافي بيع

أبرز الأسهم الكسبانة في السوق كله: بنك قناة السويس (+٩٫٥١٪)، كريدي أجريكول (+٨٫٨١٪)، وأبو ظبي الإسلامي (+٨٫٥٠٪)

أما الخسرانة: الزيوت المستخلصة ومنتجاتها (-٤٫٥٠٪)، مرسيليا المصرية الخليجية للاستثمار العقارى (-٤٫٣٥٪)، والحديد والصلب للمناجم والمحاجر (-٣٫٩٩٪)

بالنسبة لمؤشر إي جي إكس ٣٠: أبرز الكسبانة كانت كريدي أجريكول (+٨٫٨٪)، أبو ظبي الإسلامي (+٨٫٥٪)، وبالم هيلز (+٧٫٢٪)

أما الخسرانة: الشرقية ايسترن كومباني (-١٫٨٪)، فالمور القابضة-دولار (-٠٫٧٪)، وجي بي كورب (-٠٫٥٪)

إحصائيات مهمة تانية

سعر جرام الذهب عيار ٢٤ وصل لـ٧٬٠٧٥ جنيه، مرتفع يوميًا بنسبة ٢٫١٨٪ ومرتفع شهريًا بنسبة ٪٨٫١٢

الدولار وصل لـ٤٧٫١٥ جنيه في البنك الأهلي المصري

١- الحكومة بتدرس استخدام حوافز ضريبية علشان تزود السيولة في البورصة ، من خلال منح الشركات إعفاء ضريبي أولي لمدة ثلاث سنين، ممكن يمتد لو حافظوا على حجم تداول عالي، وزودوا نسبة الأسهم الحرة، واستثمروا في أعمالهم، حسب ما قال مسؤول حكومي كبير لـانتربرايز. الخطة كمان تشمل أدوات زي شهادات الذهب والفضة وائتمانات الكربون تحت نفس المظلة. وفي نفس الوقت، الحكومة بتبحث تعديل القوانين علشان تتحول البورصة نفسها لشركة مساهمة

٢- أعلنت شركة جي بي كورب إن شركتها التابعة للتأجير والتخصيم خلصت عملية توريق بقيمة ٤٫١٦ مليار جنيه. الشركة قالت إن الصفقة دي هي الأكبر في قطاع التأجير التمويلي في مصر لسنة ٢٠٢٥، والبنك التجاري الدولي، وسي آي كابيتال، والبنك العربي الأفريقي الدولي كانوا مستشارين ومنسقين للصفقة. العملية دي متوقعة تقوي سيولة الشركة وتساعدها توسع أنشطة التأجير والتخصيم بتاعتها

٣- البورصة أعلنت إنها استلمت طلب قيد رسمي من شركة جورميه فودز، لطرح رأس مال مُصدر بقيمة ١٠٠ مليون جنيه، بما يعادل ٤٠٠ مليون سهم، في السوق الرئيسي. الخطوة دي بتمثل البداية الفعلية لتحضير الطرح، واللي متوقع يتم في صورة بيع حصص قائمة من غير زيادة رأس مال. وفي الوقت نفسه، الشركة بتجهز مستندات القيد، مع استعداد مجلس إدارة بي إنفستمنتس لمناقشة الخطوات الجاية بخصوص حصتها في في الشركة البالغة %٥٣

٤- البورصة المصرية لسه موقفه التداول على سهم بريمييم هيلثكير، لحد ما الشركة ترد على استفساراتها. القرار ده جه بعد ما الشركة ماقدمتش القوائم المالية المستقلة والمجمعة للربع اللي انتهى ٣٠ سبتمبر في الوقت المحدد، رغم إنها اتغرمت ٢٠ ألف جنيه في أواخر ديسمبر. التداول هيرجع بعد ما الشركة توضح كل التفاصيل المطلوبة

١- الحكومة وافقت على مشروعين كبار في الطاقة النظيفة بقيمة حوالي ١٫٨ مليار دولار بقيادة شركة سكاتك النرويجية، وده يشمل محطة طاقة شمسية مرتبطة بتخزين البطاريات. المشروع الرئيسي “إنرجي فالي” في المنيا هيوفر حوالي ٦ تيراوات ساعة من الطاقة المتجددة سنويًا، مع محطات تحويل جديدة وخطوط نقل وكمان مصنع بطاريات محلي هيتبنى على إيد شركة صنجرو الصينية لتزويد المحطة الشمسية. المشروع هيكون أكبر منشأة شمسية مع تخزين في أفريقيا وأول نظام طاقة متجددة يشتغل ٢٤ ساعة في المنطقة. وده كله يتماشى مع خطة الحكومة للوصول إلى ٤٢٪ من مزيج الكهرباء من مصادر متجددة بحلول سنة ٢٠٣٠

٢- مصر جددت عقودها مع شركتي شل وتوتال إنرجيز لاستيراد ٦٠ شحنة غاز طبيعي مسال جديدة في ٢٠٢٦، بقيمة حوالي ٢٫٧ مليار دولار حسب الأسعار العالمية الحالية، حسب ما قال مسؤول حكومي لـالشرق. الشحنات هتبدأ من يناير وتوفر حوالي ٥٠٠ مليون قدم مكعب غاز يوميًا لمدة حوالي أسبوع لكل شحنة، مع فترة سماح للسداد لمدة سنة مرتبطة بسعر السوق. الهدف من الاستيراد هو سد الفجوة بين الإنتاج المحلي والاستهلاك، ومصر ناوية تكمل استيراد الغاز المسال بالتوازي مع تشغيل سفن التغييز لغاية سنة ٢٠٣٠

استنوا التحديثات الجديدة بكرة