صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: "جورميه إيجيبت" بتستعد للطرح في البورصة بنسبة ٤٨٪ في فبراير، في الوقت اللي حققت فيه "قناة السويس لتوطين التكنولوجيا" و"مطاحن وسط وغرب الدلتا" نمو قوي في الأرباح، و"ڤاليو" حصلت على تمويل بـ 3 مليار جنيه من البنك الأهلي

مؤشر إي جي إكس ٣٠ ارتفع بنسبة ٠٫٦٧٪ وقفَل عند ٤٣٬٣٤٦ نقطة، مؤشر إي جي إكس ٧٠ نزل بنسبة ١٫٦٢٪ وقفَل عند ١٢٬١٩٦ نقطة، ومؤشر إي جي إكس ١٠٠ نزل بنسبة ١٫٢٨٪ وقفَل عند ١٦٬٤٣٥ نقطة

قيمة التداول وصلت لـ٤٫٨ مليار جنيه، من خلال ١١٤٬٨٠١ عملية على حوالي ١٬٣٥٠٬٠٣٣٬٣٨٢ سهم

المستثمرين المحليين كانوا الوحيدين اللي سجلوا صافي بيع

أبرز الأسهم الكسبانة في السوق كله: إم. بي للهندسة (+١٢٫٣٣٪)، الإسكندرية للغزل والنسيج (+٧٫١٧٪)، والسعودية المصرية للاستثمار والتمويل (+٦٫٩١٪)

أما الخسرانة: الصناعات الهندسية المعمارية للانشاء والتعمير - ايكون (-٨٫٥٠٪)،جنوب الوادى للاسمنت (-٧٫٠٩٪)، والاستثمار العقاري العربي - اليكو (-٦٫٥٦٪)

بالنسبة لمؤشر إي جي إكس ٣٠: أبرز الكسبانة كانت البنك التجاري الدولي (+٣٫٤٪)، مصرف أبو ظبي الإسلامي (+٣٫٢٪)، والشرقية للدخان (+١٫٩٪)

أما الخسرانة: جي بي كورب (-٤٫٨٪)، إي إف جي القابضة (-٤٫٠٪)، ومصر للألومنيوم (-٣٫٣٪)

إحصائيات مهمة تانية

سعر جرام الذهب عيار ٢٤ وصل لـ٧٬٠٤٨ جنيه، منخفض يوميًا بنسبة ٠٫٨٦٪ ومرتفع شهريًا بنسبة ٪٦٫٩٦

الدولار وصل لـ٤٧٫٢٤ جنيه في البنك الأهلي المصري

١- شركة "جورميه إيجيبت" هتطرح حوالي ٤٨% من أسهمها في البورصة خلال شهر فبراير، والبيع هيتم من حصص شركة "بي إنفستمنتس" و عائلة "أبو غزالة". الشركة محققة أداء قوي بمبيعات عدت الـ 2 مليار جنيه في ٢٠٢٤، وبنك الاستثمار "هيرميس" هو اللي بيدير عملية الطرح دي. (اقرا أكتر في قسم نظرة معمقة)

٢- شركة قناة السويس لتوطين التكنولوجيا حققت أرباح مجمعة وصلت لـ ١٫١٤ مليار جنيه في أول ٣ شهور من سنتها المالية الجديدة، بزيادة حوالي ٢٣٪ عن السنة اللي فاتت. الزيادة دي جات مع انتعاش في الإيرادات اللي سجلت ١٫٥٦ مليار جنيه مقارنة بـ ١٫٢٣ مليار جنيه في نفس الفترة من السنة اللي فاتت قيمة سهم الشركة زادت بنسبة ٢٠٦٪ خلال السنة الأخيرة

٣- شركة مطاحن وسط وغرب الدلتا حققت قفزة في أرباحها بنسبة ٣٩٪، ووصل صافي الربح لـ ٢٢٥٫٩٨ مليون جنيه في النص الأول من السنة المالية الحالية. الزيادة دي جات مع ارتفاع في المبيعات اللي وصلت لـ ١٫٣٤ مليار جنيه في أول ٦ شهور من السنة. قيمة سهم الشركة طلعت بنسبة ٤٦٪ خلال السنة اللي فاتت

٤- بنك الأهلي المصري وقع اتفاقية تمويل بقيمة ٣ مليار جنيه لشركة ڤاليو (يو للتمويل الاستهلاكي) عشان يدعم نشاطها وتوسعها في السوق. التمويل ده يعتبر "سيولة مؤقتة" للشركة لحد ما تخلص إجراءات إصدار سندات جديدة

١- وزارة التعاون الدولي أعلنت إن مصر استلمت مليار يورو من الاتحاد الأوروبي، وفي طريقها لاستلام ٣ مليار يورو تانيين متقسمين على دفعتين خلال سنة ٢٠٢٦. المبلغ ده جزء من حزمة مساعدات مالية ضخمة من الاتحاد الأوروبي قيمتها الإجمالية ٥ مليار يورو لدعم الاقتصاد المصري، وكان أول جزء من الحزمة دي وصل فعلاً في يناير ٢٠٢٥

٢- شركة "ميرسك" العالمية بدأت رسمياً ترجع رحلاتها لقناة السويس تاني، وهي خطوة استراتيجية بتأكد رجوع شركات الشحن الكبيرة للمرور من البحر الأحمر. إيرادات القناة من يوليو لحد نص ديسمبر وصلت لـ ١٫٩٧ مليار دولار، بزيادة ١٧٫٥٪ عن نفس الفترة السنة اللي فاتت اللي كانت ١٫٦٧ مليار دولار، وده مؤشر لعودة الحركة لطبيعتها. الفريق أسامة ربيع بيتوقع إن الإيرادات تزيد وتوصل لحوالي ٨ مليار دولار في سنة ٢٠٢٦/٢٠٢٧، وحوالي ١٠ مليار دولار في السنة اللي بعدها

حوالي ٤٧٫٦٪ من أسهم شركة "جورميه إيجيبت" في طريقها للطرح في البورصة المصرية، وده بناءً على البيان اللي الشركة لسه مطلعاه. الطرح ده متوقع يكون في شهر فبراير، وهيكون مقسوم لجزئين: "طرح خاص" للمؤسسات الدولية، و"طرح عام" للمستثمرين في مصر

العملية دي عبارة عن "بيع ثانوي" بنسبة ١٠٠٪، وده معناه إن المساهمين الحاليين هم اللي هيبيعوا جزء من حصصهم ومش هيكون فيه أسهم جديدة بتتصدر. المساهمين اللي هيبيعوا هم شركة "بي إنفستمنتس" وعائلة "أبو
غزالة" (المؤسسين)، ومع ذلك شركة "بي إنفستمنتس" ناوية تفضل مساهم رئيسي وتحتفظ بحصة ٤٠٪ بعد الطرح

الشركة أظهرت حجم أعمال ونمو كبير قبل خطوة الطرح دي

الأداء المالي: مبيعات سنة ٢٠٢٤ وصلت لـ ٢٫١ مليار جنيه، وأرقام سنة ٢٠٢٥ لحد شهر سبتمبر مبينة زيادة بنسبة ٣٩٫٦٪ مقارنة بنفس الفترة السنة اللي فاتت.

الفروع: الشركة بتدير حالياً ٢١ فرع متوزعين ما بين القاهرة الكبرى، والساحل الشمالي، وإسكندرية، والجونة.

لتوسع الرقمي: مبيعات الأونلاين والدليفري بقت بتساهم دلوقتي بحوالي ٣٥٪ من إجمالي المبيعات.

بنك الاستثمار "إي إف جي هيرميس" هو المنسق الدولي الوحيد ومدير الطرح.

“فيه أخبار تانية بخصوص الشركة الأم "بي إنفستمنتس

 رئيس مجلس إدارة شركة "بي إنفستمنتس القابضة" قال في مقابلة مع "العربية" إن الشركة بتدرس دلوقتي كذا اختيار عشان تتخارج من شركات تانية تابعة ليها، ومن ضمن الاختيارات دي إنهم يطرحوا شركات جديدة في البورصة المصرية عشان يستفيدوا من حالة النشاط اللي رجعت للسوق تاني. وأكد إن الشركة بتدور حالياً على فرص استثمارية جديدة في قطاعات مختلفة. المجموعة بتخطط إنها تخلص صفقات قيمتها بتترواح ما بين ٢ لـ ٣ مليار جنيه خلال ٢٠٢٦

خلصنا جولتنا في السوق النهارده

استنوا التحديثات الجديدة بكرة