النهاردة: مجموعة طلعت مصطفى اترقت لفئة الشركات المتوسطة في مؤشرات فوتسي بعد ما سرعت توسعاتها وزادت مكاسب سهمها

مؤشر إي جي إكس ٣٠ تراجع بنسبة ٢٫١٨٪ وقفَل عند ٤٩٬٥٦٠ نقطة، مؤشر إي جي إكس ٧٠ نزل بنسبة ٢٫٣٥٪ وقفَل عند ١٢٬٤٢٧ نقطة، ومؤشر إي جي إكس ١٠٠ تراجع بنسبة ٢٫٢٢٪ وقفَل عند ١٧٬٤٠٩ نقطة

قيمة التداول وصلت لـ٤٫٦ مليار جنيه، من خلال ١٤١٬٩٠٨ عملية على حوالي ١٬١٦٤٬١٤٨٬٠٢٥ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: مينا فارم للأدوية (+٥٫٢٪)، القاهرة للدواجن (+٤٫٦٪)، وعبر المحيطات للسياحه (+٣٫٣٪)

أما الخسرانة: جوجرين للاستثمار الزراعي (-٧٫٨٪)، سي آي كابيتال (-٧٫٨٪)، ومستشفى النزهة الدولي (-٧٫٢٪)

بالنسبة لمؤشر إي جي إكس ٣٠: أبرز الكسبانة كانت مصر للأسمنت (+٢٫١٪)، إيديتا (+٠٫٨٪)، وكيما (+٠٫٤٪)

أما الخسرانة: راميدا (-٥٫٧٪)، فوري (-٥٫٣٪)، وجي بي كورب (-٤٫٧٪)

إحصائيات مهمة تانية

٪سعر جرام الذهب عيار ٢٤ وصل لـ٧٬٩٤٤ جنيه، منخفض يوميًا بنسبة ٠٫٠٨٪ ومرتفع شهريًا بنسبة ٧٫٨٩

الدولار وصل لـ٤٧٫٧٥ جنيه في البنك الأهلي المصري

مجموعة طلعت مصطفى القابضة اترقت في مؤشرات "فوتسي راسل"، واتنقلت من فئة الشركات الصغيرة لفئة الشركات ذات رأس المال المتوسط

التصنيف الجديد ده جه كجزء من المراجعة النص سنوية لشهر مارس ٢٠٢٦ لمنطقة الشرق الأوسط وأفريقيا، وده بعد ما الشركة استوفت كل شروط التأهل، وأهمها الحد الأدنى للقيمة السوقية

تقييم المجموعة عدى الـ ٢.٧ مليار دولار بناءً على أسعار الإغلاق في ديسمبر ٢٠٢٥، وبكده تكون عدت الحد الأدنى المطلوب للانضمام لفئة الشركات المتوسطة بكل سهولة

توقعات بزيادة السيولة وجذب انتباه المستثمرين

الترقية دي بتعكس زيادة الثقة الدولية في الأداء المالي والتشغيلي للشركة، ومتوقع إنها تزود جاذبية السهم للمستثمرين الأجانب من المؤسسات والصناديق العالمية

ومتوقع كمان إن زيادة وزن الشركة في المؤشر تحسن سيولة التداول، وتوسع قاعدة الملكية الأجنبية، وتأكد مكانة الشركة كواحدة من أكبر المطورين العقاريين المدرجين في الأسواق الناشئة

توسعات الشركة في المنطقة بتزيد سرعتها

وبجانب ترقيتها في المؤشر، مجموعة طلعت مصطفى بتسرع من معدلات نموها في المنطقة وجوه مصر كمان. في سلطنة عُمان، الشركة بتستثمر أكتر من ٥ مليار دولار في مشروعين وهما "جود" و"يمال"، ودول على مساحة بتعدي ٤.٩ مليون متر مربع، والمفروض يوفروا حوالي ١٥،٠٠٠ وحدة سكنية ضمن خطة "رؤية عُمان ٢٠٤٠

وعلى المستوى المحلي، المجموعة كمان بتطور مجمع سياحي متكامل بتكلفة ٧٨٨ مليون دولار ورا المتحف المصري الكبير، وبيضم فندق خمس نجوم ومرافق متعددة الاستخدامات، ومتوقع إنه يحقق دخل كبير ومستمر جنب مبيعات العقارات

أداء قوي في الفترة الأخيرة

الشركة، اللي بتمثل ١١.٢٠٪ من وزن مؤشر البورصة المصرية الرئيسي، شهدت نشاط قوي من بداية السنة. قيمة سهمها زادت بنسبة ١٣٪ من بداية ٢٠٢٦، وده وصل إجمالي مكاسبها في الـ ١٢ شهر اللي فاتوا لـ ٪٧٦

١- مصر بتخطط تطرح مزايدة عالمية للتنقيب عن الدهب في الصحراء الشرقية في الربع التاني من سنة ٢٠٢٦، والمزايدة دي بتشمل أكتر من ٢١٠ قطاع، وده حسب كلام مسؤول حكومي لـ "الشرق". الخطوة دي هدفها جذب استثمارات في مجال التعدين بقيمة ١ مليار دولار وزيادة إنتاج الدهب، وده بيأكد على تركيز الحكومة إنها تخلي قطاع التعدين محرك أساسي لجذب الاستثمارات الأجنبية ودعم النمو الاقتصادي

٢- مصر بتزود استثماراتها في قطاع الصحة بحزمة حوافز جديدة وفرص أكتر لمشاركة القطاع الخاص، وده اللي قاله مصدر حكومي مسؤول ل "إنتربرايز". الإصلاحات دي هدفها تجذب الاستثمار الأجنبي وتدعم تطوير ٦٢ منشأة طبية، بعد ما كانوا ٧ بس السنة اللي فاتت، ومن ضمنهم مستشفيات كبيرة زي مستشفى الشيخ زايد، والعلمين الجديدة، والجلالة، والعجوزة