النهاردة: أرباح برايم القابضة قفزت ١٦٠٪ والشمس للإسكان والتعمير سجلت نمو، في حين ممفيس للأدوية طلبت زيادة راس المال، وفاليو أطلقت خدمة تمويل للمعاملات الكبيرة

مؤشر إي جي إكس ٣٠ ارتفع بنسبة ٠٫٦٦٪ وقفَل عند ٥١٬٨٣٣ نقطة، مؤشر إي جي إكس ٧٠ ارتفع بنسبة ٠٫٨٧٪ وقفَل عند ١٢٬٩٩٤ نقطة، ومؤشر إي جي إكس ١٠٠ ارتفع بنسبة ٠٫٨٨٪ وقفَل عند ١٨٬١٣٣ نقطة

قيمة التداول وصلت لـ٧٫٩ مليار جنيه، من خلال ١٦٥٬٣٣٧ عملية على حوالي ١٬٥٧٨٬٧٢١٬٠٢٥ سهم

المستثمرين الإقليميين كانوا الوحيدين اللي سجلوا صافي بيع

أبرز الأسهم الكسبانة في السوق كله: مستشفى النزهة الدولي (+١٨٫٢٪)، ماكرو جروب للمستحضرات الطبية (+١٣٫٧٪)، وموبكو (+٧٫٣٪)

أما الخسرانة: جو جرين للاستثمار الزراعي (-٤٫٢٪)، المهندس للتأمين (-٣٫٠٪)، وكرستمارك للمقاولات والتطوير العقاري (-٢٫٩٪)

بالنسبة لمؤشر إي جي إكس ٣٠: أبرز الكسبانة كانت أوراسكوم للتنمية (+٦٫٠٪)، مجموعة طلعت مصطفى (+٤٫٠٪)، وراميدا (+٣٫٨٪)

أما الخسرانة: أبو قير للأسمدة (-١٫٩٪)، المصرية للاتصالات (-١٫٧٪)، وإيديتا (-١٫٧٪)

إحصائيات مهمة تانية

سعر جرام الذهب عيار ٢٤ وصل لـ٧٬٥٤١ جنيه، منخفض يوميًا بنسبة ١٫١٧٪ ومرتفع شهريًا بنسبة ٪٦٫٩٨

الدولار وصل لـ٤٦٫٩٧ جنيه في البنك الأهلي المصري

١. أرباح شركة برايم القابضة نطت بنسبة ١٦٠٪ في سنة ٢٠٢٥ وسجلت ١٠٨.٤٤ مليون جنيه. الزيادة دي سببها الرئيسي قفزة في الإيرادات اللي وصلت لـ ٢٨٣.٢ مليون جنيه مقارنة بـ ٢١٠ مليون السنة اللي قبلها، حسب بيان الشركة للبورصة إمبارح. جدير بالذكر سهم الشركة زاد ٢٧٪ من بداية ٢٠٢٦، وبكده تبقى مكاسبه في آخر سنة وصلت لـ ٪٢١٢

٢. شركة الشمس للإسكان والتعمير كمان حققت نمو في صافي أرباحها بنسبة ١.٥٪ في ٢٠٢٥ ووصلت لـ ١٦٢.١ مليون جنيه، بدعم من الإيرادات اللي زادت وسجلت ٢٢٠.٩ مليون جنيه بعد ما كانت ١٧٨ مليون قبل سنة، حسب بيان الشركة للبورصة إمبارح. سهم الشركة نزل ١٢٪ من أول ٢٠٢٦، ومكاسبه في آخر سنة بقت ٪٢١

أخبار غير متعلقة بالأرباح

٣. شركة ممفيس للأدوية والصناعات الكيماوية قدمت طلب عشان تزود راس مالها المرخص به من ٣٠٠ مليون جنيه لـ ١.١ مليار جنيه، حسب بيان الشركة للبورصة إمبارح. والطلب ده حالياً بيتراجع عشان يتعرض على لجنة القيد. سهم الشركة نزل ٢٪ من أول ٢٠٢٦، ومكاسبه في آخر سنة وصلت لـ ٪١٦٦

٤. شركة فاليو نزلت خدمة جديدة للتمويل الفوري للمعاملات الكبيرة اللي بتبدأ من مليون جنيه، والتقديم فيها بيكون بالبطاقة الشخصية بس عن طريق الأبلكيشن. الشركة عايزة توسع دايرة التمويل عشان تشمل أصحاب المهن الحرة والناس اللي بتواجه صعوبة مع طلبات البنوك التقليدية. جدير بالذكر إن الشركة ادائها قوي من أول ٢٠٢٦ وسهمها زاد ٣٠٪ من أول السنة

١. الاقتصاد المصري نما بأكتر من ٥.٣٪ في النص الأول من السنة المالية ٢٠٢٥-٢٠٢٦، بدعم من قطاعات السياحة والتصنيع وإيرادات قناة السويس، حسب تصريحات وزير التخطيط أحمد رستم لـ "الشرق". الوزير قال كمان إن الحكومة بتستهدف نمو يقرب من ٥٪ للسنة كلها، في الوقت اللي البنك المركزي شايف إن متوسط النمو هيكون ٥.١٪، أما صندوق النقد الدولي فمتوقع ٤.٧٪ السنة دي، و٥.٤٪ في ٢٠٢٦-٢٠٢٧

٢. وزارة المالية خلصت استراتيجية الدين متوسطة الأجل الجديدة ورفعتها لمجلس الوزراء، حسب تصريحات مصدر حكومي مسئول لـ "إنتربرايز". الاستراتيجية دي بتهدف لتقليل تكلفة الاستدانة وتطويل مدة السداد. الخطة كمان بتستهدف نزول الدين لأقل من ٧٥٪ من الناتج المحلي الإجمالي، وتقليل تكلفة الفوايد لحوالي ٧٪ خلال ٣ سنين، وده هيتم عن طريق مد آجال الدين وإصدار سندات محلية لمدة ١٥ سنة، مع زيادة السيولة تمهيداً للرجوع لمؤشر "جي بي مورجان" للأسواق الناشئة