النهاردة عندنا تحليل عن سر تفوق إي جي إكس ٣٠ عالمياً، وخبر من بنيان اللي أجرت مبناها في مدينة نصر لمستأجر جديد، وتفاصيل أداء المصريه لمدينة الانتاج الاعلامى في ٢٠٢٥

مؤشر إي جي إكس ٣٠ ارتفع بنسبة ٠٫٧٥٪ وقفَل عند ٥٢٬٢٢٢ نقطة، مؤشر إي جي إكس ٧٠ ارتفع بنسبة ٠٫٩٣٪ وقفَل عند ١٣٬١١٤ نقطة، ومؤشر إي جي إكس ١٠٠ ارتفع بنسبة ١٫١٤٪ وقفَل عند ١٨٬٣٣٩ نقطة

قيمة التداول وصلت لـ٨٫٨ مليار جنيه، من خلال ١٧٤٬٦٣٢ عملية على حوالي ١٬٨٨١٬١٤٧٬٩١٦ سهم

المستثمرين الأجانب كانوا الوحيدين اللي سجلوا صافي بيع

أبرز الأسهم الكسبانة في السوق كله: مستشفى النزهة الدولي (+١٣٫٣٪)، راية القابضة (+١٢٫٥٪)، والإسماعيلية مصر للدواجن (+٧٫٦٪)

أما الخسرانة: القاهرة الوطنية للاستثمار (-٣٫٦٪)، مطاحن وسط وغرب الدلتا (-٣٫٦٪)، والعامة لصناعة الورق - راكتا (-٣٫٤٪)

بالنسبة لمؤشر إي جي إكس ٣٠: أبرز الكسبانة كانت راية القابضة (+١٢٫٥٪)، بلتون القابضة (+٦٫٤٪)، ومصر للأسمنت (+٦٫٤٪)

أما الخسرانة: النساجون الشرقيون للسجاد (-٠٫٨٪)، مصر الجديدة للإسكان (-٠٫٧٪)، والبنك التجاري الدولي (-٠٫٧٪)

إحصائيات مهمة تانية

سعر جرام الذهب عيار ٢٤ وصل لـ٧٬٦٣٠ جنيه، مرتفع يوميًا بنسبة ١٫١٩٪ ومرتفع شهريًا بنسبة ٪٨٫٢٥

الدولار وصل لـ٤٦٫٩٦ جنيه في البنك الأهلي المصري

السوق المصري عايش واحدة من أقوى موجات الصعود من سنين. المؤشر الرئيسي إي جي إكس ٣٠ كسر حاجز جديد وقفل امبارح عند ٥٢،٢٢٢ نقطة. ده صعود بحوالي ٢٥٪ من أول ٢٠٢٦ بس، وده بيبني على مكاسب قوية جداً حققها في ٢٠٢٥ وصلت لـ ٤٠.٦٪، في إشارة واضحة إن شهية المستثمرين مفتوحة

تقدم دولي

السوق المصري مش بس بيتحرك، ده سابق الأسواق الناشئة والمتقدمة كمان. لو حسبنا الأداء بالدولار، هنلاقي المؤشر زايد ٣٠٪ من أول السنة، يعني ضعف أداء مؤشر الأسواق الناشئة "إم إس سي آي" حسب وكالة بلومبرغ، وسابق بمسافة كبيرة الأسواق العالمية. ده جاي بعد ما المستثمرين الأجانب عملوا عوائد ٥٠٪ السنة اللي فاتت، بفضل الإصلاحات اللي ركزت على القطاع الخاص، وتنزيل التضخم، وضبط الديون

السر في "المركزي" والسيولة

المحرك الرئيسي للي بيحصل ده هو السياسة النقدية، حسب بلومبرغ. خفض الفائدة الأخير خلى المؤشر ينط ٥٪ في يومين، وده كمل مسار التيسير اللي بدأ من السنة اللي فاتت بأكتر من ٧٠٠ نقطة أساس. كمان خفض الاحتياطي الإلزامي ساعد في ضخ سيولة في السوق. ومع استقرار سعر الصرف وتوافر الدولار (بعد حزمة تمويل دولية ضخمة من الامارات و صندوق النقد الدولي وصلت ل ٥٧ مليار دولار)، الأجانب رجعوا للسوق وبقوة،حسب الوكالة. نسبتهم في التداولات وصلت ١٤٪ في شهر فبراير، بعد ما كانت يدوب ٥.٥٪ السنة اللي فاتت

مين اللي شايل المؤشر؟

الأسهم الكبيرة هي اللي بتقود التقدم ده، ودي نظرة سريعة على أداء أكبر الشركات في إي جي إكس ٣٠ من أول السنة

البنك التجاري الدولي: (صاحب الوزن الأكبر في المؤشر بوزن ٣٣.٩١٪) زاد ٪٣٦.٦

مجموعة طلعت مصطفى: (وزن ١١.٤٥٪) طلعت ٪٢٠.٤٦

الشرقية إيسترن كومباني: (وزن ٧.٤٢٪) زادت ٪١١.٠٢

فوري: (وزن ٦.٣٩٪) عملت أداء قوي وزادت ٪٢٧.٧٣

المصرية للاتصالات: (وزن ٦.١٣٪) قفزت ٪٤٨.٥٥

إي فاينانس: (وزن ٤.٨٩٪) زادت ٪٢٥.٩١

٪إي إف جي القابضة: (وزن ٣.٦٧٪) طلعت ٢٣.٨٤

أبوقير للأسمدة: (وزن ٢.٧٥٪) زادت ٪٣٤.٧١

مصرف أبوظبي الإسلامي: (وزن ٢.٥٥٪) عمل قفزة بـ ٪٤٧.١٦

النظرة المستقبلية

الإصلاحات الاقتصادية المستمرة، واستقرار سوق الصرف، وخطط طرح شركات مملوكة للدولة في البورصة، مع مبادرات جديدة في السوق زي بدء تداول المشتقات في مارس ونجاح طروحات زي طرح جورميه، ساهمت في تعزيز اهتمام المستثمرين المحليين والأجانب في الأسهم المصرية، حسب ما أضافت بلومبرغ.

ومع توافر العوامل الداعمة دي، لسه التقييمات الحالية للسوق جاذبة. ألين سانديب، مدير قسم الأسهم في شركة أكت فاينانشال، قال في تصريحات لـ بلومبرغ إن البورصة المصرية ماشية حالياً في مسار إعادة تقييم إيجابي. وأضاف إن السوق بيتداول بمضاعف ربحية ٩ مرات بس، في حين الأسواق الناشئة بتتداول عند ١٨ مرة، يعني لسه فيه مساحة للصعود

١- شركة بنيان وقعت عقد إيجار لمدة ٥ سنين لمبنى (١٠٦ ب) في مدينة نصر بمساحة ٤٢٩٧ متر مربع، والمستأجر الجديد شركة كورتيك التابعة لمجموعة حسن علام، وهيستلموا المبنى في مايو الجاي بعد انتهاء عقد "بي تك". الصفقة دي جزء من خطة أكبر للشركة لإعادة تسعير ١٥١٧٦ متر مربع من عقود الإيجار اللي هتنتهي في ٢٠٢٦، واللي بتمثل حوالي ٤٢٪ من إيرادات الإيجار بالجنيه. الاتفاقية دي جات بعد أيام من توقيع عقد تاني كبير مع نستله ب ١٧ مليون دولار. جدير بالذكر إن سهم الشركة زاد ٠.٧٨٪ بس من أول السنة، ونازل بأكتر من ٢١٪ من ساعة ما نزل البورصة السنة اللي فاتت

٢- المصرية لمدينة الإنتاج الإعلامي أعلنت عن تراجع أرباحها بنسبة ٢.٢٪ في ٢٠٢٥، وسجلت صافي ربح ٧٨٣.٥٦ مليون جنيه، حسب بيان الشركة للبورصة امبارح. التراجع ده حصل رغم إن الإيرادات زادت بشكل ملحوظ ووصلت لـ ١.٢٧ مليار جنيه مقارنة بـ ١.١١ مليار السنة اللي قبلها. سهم الشركة ماتحركش تقريباً من أول ٢٠٢٦، بس زاد ٢٧٪ خلال السنة اللي فاتت