صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: التجاري الدولي سجل أرباح قياسية بعد قفزة ٥٧٪ في الربع الأخير، وبلتون أتمت صفقة استحواذ على "باوباب" بـ ١٩٧.٦ مليون يورو، وسهم "جورميه" إرتفع بنسبة ٤٠٪ في أول جلسة تداول ليه

مؤشر إي جي إكس ٣٠ ارتفع بنسبة ٠٫١٦٪ وقفَل عند ٥٠٬٣٧٦ نقطة، مؤشر إي جي إكس ٧٠ ارتفع بنسبة ٠٫٤١٪ وقفَل عند ١٢٬٩٣٥ نقطة، ومؤشر إي جي إكس ١٠٠ ارتفع بنسبة ٠٫٣١٪ وقفَل عند ١٧٬٩٢٨ نقطة

قيمة التداول وصلت لـ٨٫٤ مليار جنيه، من خلال ١٧٣٬٩٣٤ عملية على حوالي ٢٬٧٧٤٬٨٦٢٬٤٧٧ سهم

المستثمرين الأجانب كانوا الوحيدين اللي سجلوا صافي بيع

أبرز الأسهم الكسبانة في السوق كله: جورميه مصر (+٤٠٪)، الدولية للأسمدة والكيماويات (+١٠٫٩٩٪)، المتحدة للإسكان (+٩٫٠٦٪)

أما الخسرانة: المصرية للدواجن (-٩٫٨٣٪)، القاهرة للدواجن (-٤٫٥٨٪)، وكريدي أجريكول (-٣٫٧٣٪)

بالنسبة لمؤشر إي جي إكس ٣٠: أبرز الكسبانة كانت مصر الجديدة للاسكان والتعمير (+٣٫٩٪)،المصرية للاتصالات (+٢٫٢٪)، وإي إف جي القابضة (+٢٫٠٪)

أما الخسرانة: إيديتا (-٢٫٣٪)، ابن سينا فارما (-٢٫٠٪)، والقلعة (-١٫٥٪)

إحصائيات مهمة تانية

سعر جرام الذهب عيار ٢٤ وصل لـ٧٬٦٩٥ جنيه، منخفض يوميًا بنسبة ١٫٠١٪ ومرتفع شهريًا بنسبة ٪١١٫٤٧

الدولار وصل لـ٤٦٫٨٤ جنيه في البنك الأهلي المصري

. البنك التجاري الدولي أعلن عن قفزة بنسبة ٥٧٪ على أساس سنوي في صافي ربح الربع الرابع من ٢٠٢٥ وسجل ٢٠.١ مليار جنيه، وده ساهم في تحقيق أرباح سنوية قياسية حسب آخر تقرير للأرباح من الشركة. (اقرأ أكتر في قسم نظرة معمقة)

٢. بلتون القابضة أتمت الاستحواذ الكامل على مجموعة "باوباب" بـ ١٩٧.٦ مليون يورو، حسب بيان من الشركة. الخطوة دي بتفتح لـ بلتون الباب لدخول أسواق أفريقية زي السنغال، وكوت ديفوار، ونيجيريا، وغيرها، كجزء من استراتيجيتها للتوسع الإقليمي. (اقرأ أكتر في قسم نظرة معمقة)

:أخبار الطروحات

٣. سهم جورميه وصل للحد الأقصى للصعود في أول يوم تداول إمبارح، وارتفع ٤٠٪ عشان يقفل عند ٩.٦٦ جنيه مقارنة بسعر الفتح ٦.٩ جنيه. الشركة —اللي "بي إنفستمنتس" بتمتلك فيها حصة ٤٠٪— بتستهدف مبيعات بـ ٣ مليار جنيه السنادي، مقارنة بـ ٢.١ مليار في ٢٠٢٥، حسب تصريحات شادي أبو سعد العضو المنتدب للشركة. أبو سعد قال كمان إن فيه خطة لفتح من ٣ لـ ٤ فروع جديدة سنوياً في مصر والتوسع في الخليج والشرق الأوسط بداية من ٢٠٢٧، مع سياسة توزيع أرباح بتعدي ٥٠٪ من صافي الربح

٤. صيدليات العزبي —اللي بي إنفستمنتس بتمتلك ٤٩٪ منها— بتدرس الطرح في البورصة المصرية في ٢٠٢٧، بس الخطط لسه مبدئية، حسب كلام حازم بركات رئيس مجلس إدارة بي إنفستمنتس لـ الشرق. وفي سياق تاني، بركات قال إن بي إنفستمنتس بتخطط تضخ استثمارات بحوالي ٣ مليار جنيه خلال السنين الحالية والجاية، بما فيها استحواذات محتملة بقيمة ٥٠٠ مليون جنيه للصفقة الواحدة في قطاعات الرعاية الصحية، والتعليم، والأغذية والمشروبات

١. معدل التضخم في مدن مصر تراجع لـ ١١.٩٪ في يناير ٢٠٢٦، نزولاً من ١٢.٣٪ في ديسمبر. محللين قالوا لقناة "العربية" إن الاتجاه النزولي للتضخم متوقع يستمر خلال ٢٠٢٦، وده بيعزز احتمالية إن البنك المركزي يخفض الفائدة بحوالي ١٠٠ نقطة أساس في اجتماعه الجاي، مع توقعات إن إجمالي الخفض يوصل لما بين ٥٠٠ و٦٠٠ نقطة أساس على مدار السنة

٢. مصر بتسعى لاقتراض ٢٢٧ مليون يورو (قرض ميسر) من إسبانيا لتمويل استيراد مكونات لصيانة ٣٩ قطار بالخط التاني لمترو الأنفاق، والحكومة هتغطي التكاليف المحلية وعقود الصيانة لمدة ١٠ سنين، وفقاً لـ ٣ مصادر اتكلمت مع الشرق. المشروع ده جزء من خطة أوسع لتحديث المترو والسكك الحديدية، بتشمل تطوير الخطين الأول والتاني، وخطوط المونوريل، والقطار الكهربائي السريع لمرسى مطروح

أعلن البنك التجاري الدولي عن قفزة في صافي الدخل بنسبة ٥٧٪ على أساس سنوي في الربع الرابع من عام ٢٠٢٥، عشان يوصل لـ ٢٠.١ مليار جنيه. الإدارة رجعت الختام القوي للسنة دي لحالة الاستقرار النسبي في الأوضاع الاقتصادية المحلية والنمو الحقيقي في الأنشطة الأساسية للبنك

توسع أرباح البنك خلال الربع ده كان مدعوم بإيرادات مجمعة قيمتها ٣٣.٧ مليار جنيه، بزيادة ٢٥٪ مقارنة بالربع الرابع من ٢٠٢٤

أداء سنوي قياسي بالنسبة لسنة ٢٠٢٥ كلها

البنك حقق صافي دخل قياسي بلغ ٨٢.٢ مليار جنيه، بزيادة ٤٩٪ على أساس سنوي. الإدارة وضحت إنه حتى لو استبعدنا التأثير الإيجابي لرد مخصصات خسائر الائتمان، صافي الربح السنوي هيفضل عند ٧٠.٦ مليار جنيه، بنمو ٪٢٨

ووصلت الإيرادات المجمعة للسنة كلها لـ ١١٧ مليار جنيه، بزيادة ١٩٪ عن ٢٠٢٤

النتائج القوية دي استندت لتوسع ملحوظ في الميزانية العمومية

نمو الإقراض: محفظة القروض الإجمالية زادت بنسبة ٤٤٪ وسجلت ٥٧٦ مليار جنيه، والفضل الأكبر كان لتسارع نشاط قروض الشركات اللي ارتفع بنسبة ٪٤٥

قاعدة الودائع: ودائع العملاء زادت ١٤٪ على أساس سنوي ووصلت لـ ١.١١ تريليون جنيه، مع ارتفاع حصة الحسابات الجارية والتوفير لـ ٦١٪ من إجمالي الودائع

أداء قوي للسهم مؤخرًا

 قيمة سهم الشركة زادت تقريبًا ٣٣٪ من بداية السنة، وده ساعد المؤشر الرئيسي للبورصة (إي جي إكس ٣٠) إنه يوصل لمستوى قياسي، خصوصًا إن "التجاري الدولي" بيمثل تقريبًا ٣٢٪ من وزن المؤشر الرئيسي. وبشكل عام، أسهم الشركة زادت ٩٢.٦٧٪ خلال السنة اللي فاتت

الخطة مستقبلية 

البنك بيخطط يستثمر حوالي ٣٠٠ مليون دولار خلال الثلاث سنين الجاية لإطلاق بنك رقمي مستقل، بيستهدف ١٠ مليون عميل شاملين الشركات الصغيرة والمتوسطة والمصريين في الخارج. البنك قدم طلب للحصول على رخصة من البنك المركزي المصري، وبيهدف لتأسيس شركة قابضة في أبو ظبي عشان تملك الكيان الجديد ده، ومن المتوقع بدء العمليات في أواخر ٢٠٢٥ أو أوائل ٢٠٢٦

بلتون القابضة وسعت تواجدها في أفريقيا بعد إتمام الاستحواذ الكامل على مجموعة "باوباب" في صفقة قيمتها ١٩٧.٦ مليون يورو، حسب بيان من الشركة

التأثير

الاستحواذ ده بيفتح لـ بلتون الباب فوراً لدخول أسواق أفريقية زي السنغال، وكوت ديفوار، ومدغشقر، وبوركينا فاسو، ومالي، والكونغو، ونيجيريا، ودي خطوة رئيسية في استراتيجية النمو الإقليمي للمجموعة

باوباب شغلها الأساسي هو تمويل المشروعات الصغيرة ومتناهية الصغر، وبتركز على المنصات الرقمية اللي بتخلي الاقتراض أسرع وأسهل. المجموعة بتخدم حوالي ١.٦ مليون عميل 

لحد الربع التالت من ٢٠٢٥، باوباب كانت بتدير محفظة قروض قيمتها ٨٤٨.٨ مليون يورو، وطلعت حوالي ٤ مليون قرض للمشروعات الصغيرة

الصفقة دي جاية بعد أداء قوي لـ بلتون

بلتون أعلنت عن صافي ربح (بعد الضرائب وحقوق الأقلية) وصل لـ ١.٥ مليار جنيه في أول ٩ شهور من ٢٠٢٥، بزيادة ٣٢٪ عن نفس الفترة السنة اللي فاتت. وده حصل نتيجة زيادة إيرادات التشغيل بنسبة ٩٧٪ عشان توصل لـ ٩.٦ مليار جنيه، بدعم من الأداء القوي لقطاعات المؤسسات المالية غير المصرفية، وبنوك الاستثمار، وإدارة الأصول