صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: مساهمين أوراسكوم وافقوا على الاندماج مع "أو سي أي"، "ابن سينا فارما" حصلت على تمويل بـ 1.3 مليار جنيه، طرح "جورميه" بدأ امبارح، ونتائج أعمال "الإسكندرية للأدوية" و"الإسكندرية لتداول الحاويات" طلعت امبارح

مؤشر إي جي إكس ٣٠ ارتفع بنسبة ٠٫٨٥٪ وقفَل عند ٤٦٬٨٥٧ نقطة، مؤشر إي جي إكس ٧٠ نزل بنسبة ٠٫٥٢٪ وقفَل عند ١٢٬٧١٧ نقطة، ومؤشر إي جي إكس ١٠٠ نزل بنسبة ٠٫٠٣٪ وقفَل عند ١٧٬٣١٢ نقطة

قيمة التداول وصلت لـ٦٫٧ مليار جنيه، من خلال ١٧٢٬٨٦٣ عملية على حوالي ١٬٩٧١٬٥٧٦٬١٣٧ سهم

المستثمرين الأجانب كانوا الوحيدين اللي سجلوا صافي شراء

أبرز الأسهم الكسبانة في السوق كله: الاسماعيلية الوطنية للصناعات الغذائية (+١٣٫٤٨٪)، ماكرو جروب للمستحضرات الطبية (+١٠٫٣٧٪)، وبرايم القابضة (+٧٫٦٢٪)

أما الخسرانة: ديجيتايز للاستثمار (-٤٫٩٨٪)، النصر لتصنيع الحاصلات الزراعية (-٤٫٩٥٪)، وأطلس للاستثمار والصناعات الغذائية (-٤٫٨٩٪)

بالنسبة لمؤشر إي جي إكس ٣٠: أبرز الكسبانة كانت سيدبك (+٦٫٤٪)، راية القابضة (+٦٫٤٪)، وجهينة (+٤٫٩٪)

أما الخسرانة: كريدي أجريكول (-٢٫٦٪)، مصر للأسمنت (-٢٫٢٪)، وفوري (-١٫٩٪)

إحصائيات مهمة تانية

سعر جرام الذهب عيار ٢٤ وصل لـ٧٬٨٤٥ جنيه، مرتفع يوميًا بنسبة ١٫٦١٪ ومرتفع شهريًا بنسبة ٪١٣٫٩٤

الدولار وصل لـ٤٧٫٠٤ جنيه في البنك الأهلي المصري

- مساهمين أوراسكوم كونستراكشون وافقوا على الاندماج مع شركة أو سي أي وزيادة رأس المال لـ ٢٠٧٫٤ مليون دولار عشان تبادل الأسهم. بس الصفقة لسه واقفة بسبب حكم محكمة في هولندا منع شركة أو سي أي من التصويت وعيّن مديرين مستقلين ليهم حق الرفض. (اقرا أكتر في قسم نظرة معمقة)

٢- البنك الأوروبي لإعادة الإعمار والتمويل  وافق يدي قرض بقيمة ١٫٣ مليار جنيه لشركة ابن سينا فارما، وده عشان يمول إنشاء مخزن جديد متوافق مع المعايير البيئية. المشروع ده هدفه يقلل انبعاثات الكربون ويوفر في استهلاك الميه، وفي نفس الوقت يدعم خطط الشركة للتوسع في شبكة مخازنها

٣- شركة "جورميه" بتسعى لجمع سيولة بتوصل لـ ١٫٣ مليار جنيه عن طريق طرح ٤٧٫٦٪ من أسهمها في البورصة، وده بيقدّر قيمتها السوقية في حدود ٢٫٥ لـ ٢٫٨ مليار جنيه. طرح المؤسسات بدأ من امبارح ومكمل لحد الخميس الجاي، وبالنسبة للمستثمرين الأفراد فالاكتتاب مفتوح قدامهم لحد ٤ فبراير. التداول هيبدأ رسمياً في البورصة يوم ٩ فبراير تقريباً

٤- الإسكندرية لتداول الحاويات والبضائع سجلت تراجع بسيط في صافي أرباحها بنسبة ٢٪ لـ ٣٫٣٤ مليار جنيه في أول ٦ شهور من السنة المالية الحالية. التراجع ده جه بالتزامن مع انخفاض المبيعات لـ ٣٫٧٨ مليار جنيه، مقارنة بـ ٣٫٩٣ مليار جنيه في نفس الفترة من السنة اللي فاتت. جدير بالذكر أن قيمة سهم الشركة ارتفعت ٧٪ خلال الست شهور اللي فاتت

٥- صافي الربح لشركة الإسكندرية للأدوية زاد بنسبة ٢٧٫٢٪ ووصل لـ ٢٨٨٫٨٨ مليون جنيه في أول ٦ شهور من السنة المالية (يوليو–ديسمبر ٢٠٢٥).  الإيرادات كمان طلعت لـ ١٫٧ مليار جنيه مقابل ١٫٥٦ مليار جنيه. قيمة سهم الشركة زادت بنسبة ٤١٪ في آخر ٦ شهور

النهاردة

 مصر للزيوت والصابون - معاد الاستحقاق لكوبون بقيمة ٠.٥٠ جنيه للسهم. والصرف هيكون ٢٩ يناير

٢٩ يناير ٢٠٢٦ 

مصر لصناعة الكيماويات - معاد صرف كوبون بقيمة ٢ جنيه للسهم. وتاريخ الاستحقاق كان ٣ نوفمبر

١- مؤسسة "بي إم آي" رفعت توقعاتها لنمو الاقتصاد المصري لـ ٥٫٣٪ السنة دي، وده يعتبر أكتر رقم متفائل مقارنة بتوقعات الحكومة وصندوق النقد. التقرير بيتوقع استقرار الدولار مع خفض كبير في الفايدة بحوالي ٦٠٠ نقطة أساس في ٢٠٢٦. لكن رغم التفاؤل ده، فيه تحذير من إن نص الاحتياطي الأجنبي جاي من "الأموال الساخنة" (استثمارات الأجانب قصيرة الأجل في الديون)، وده بيخلي الاقتصاد معرض للخطر لو المستثمرين قرروا يسحبوا فلوسهم فجأة لأي سبب

٢- مجموعة "ساني جروب" الصينية بتخطط لإنشاء أول مصنع لتوربينات الرياح في مصر، ودي خطوة مهمة جداً لتوطين الصناعات التقيلة الخاصة بالطاقة المتجددة. المشروع ده بيعتبر نقلة صناعية أكبر بكتير من تصنيع الألواح الشمسية، لأنه بيحتاج تكنولوجيا دقيقة ومساحات ضخمة لتصنيع مروح وأبراج التوربينات العملاقة

وافقت الجمعية العمومية لشركة أوراسكوم كونستراكشون بنسبة ٩٨٫٠١٪ على الاستحواذ على قطاع المقاولات التابع لشركة "أو سي آي"، في خطوة بتعكس دعم كبير من المساهمين. كمان أقرت الجمعية زيادة رأس المال المدفوع لـ ٢٠٧٫٤ مليون دولار، مع تفويض مجلس الإدارة بإصدار أسهم جديدة بناءً على معامل مبادلة ٠٫٤٦٣٤ سهم أوراسكوم لكل سهم في "أو سي آي"، وده تمهيداً لتأسيس كيان موحد بحجم أعمال بيوصل لـ ١٤ مليار دولار

هيكل الصفقة

الصفقة قايمة على نظام مبادلة أسهم، بحيث يستبدل مساهمين "أو سي آي" حصصهم بأسهم في أوراسكوم كونستراكشون. وبعد ما تخلص عملية التبادل، الخطة إن شركة "أو سي آي" تتصفى وتتشطب من بورصة أمستردام، على أن يتم قيد الأسهم الجديدة في بورصة أبوظبي، عشان تتكون منصة عالمية للمقاولات والاستثمار

عقبة قانونية بتعطل التنفيذ

رغم موافقة مساهمين أوراسكوم، الصفقة لسه واقفة بسبب حكم قضائي من محكمة هولندية صدر قبل أيام من التصويت، بيمنع شركة "أو سي آي" من إتمام الاندماج. كمان المحكمة قررت تعيين مديرين مستقلين ليهم سلطة الاعتراض، وده ممكن يخلي ناصف ساويرس يضطر يعيد هيكلة الصفقة أو يقدم تنازلات تانية عشان يتماشى مع طلبات القضاء الهولندي