صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: سيدبك ومصر لصناعة الكيماويات سجلوا تراجع في الأرباح ، ممفيس للأدوية حققت نمو، وفي نفس الوقت بلتون أعلنت انها عززت تواجدها في المغرب من خلال إستثمار جديد. وعندنا كمان آخر أخبار أداء البورصة المصرية في شهر يناير 

مؤشر إي جي إكس ٣٠ نزل بنسبة ٠٫٢٦٪ وقفَل عند ٤٧٬٦٦٢ نقطة، مؤشر إي جي إكس ٧٠ ارتفع بنسبة ١٫٨٦٪ وقفَل عند ١٢٬٣٧٥ نقطة، ومؤشر إي جي إكس ١٠٠ ارتفع بنسبة ١٫٦١٪ وقفَل عند ١٧٬٠٩٨ نقطة

قيمة التداول وصلت لـ٥٫٣ مليار جنيه، من خلال ١٤٢٬٦٠٣ عملية على حوالي ١٬٧٩٦٬٢٥٤٬٣٤٦ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: المتحدة للإسكان والتعمير (+١٩٫٩٨٪)، ممفيس للأدوية (+١٤٫١١٪)، ارابيا انفستمنتس هولدنج (+١٠٫٠٤٪)

أما الخسرانة: جوجرين للاستثمار الزراعي (-٤٫١٧٪)، ماكرو جروب للمستحضرات الطبية (-٣٫٦٢٪)، مجموعة النعيم العقارية القابضة (-٣٫٢٩٪)

بالنسبة لمؤشر إي جي إكس ٣٠: أبرز الكسبانة كانت إيديتا (+٥٫٠٪)، القلعة (+٤٫٨٪)، ومصر للألومنيوم (+٤٫٢٪)

أما الخسرانة: جي بي كورب (-٢٫٠٪)، البنك التجاري الدولي (-١٫٩٪)، وإي إف جي القابضة (-١٫٣٪)

إحصائيات مهمة تانية

سعر جرام الذهب عيار ٢٤ وصل لـ٧٬٤٢٠ جنيه، منخفض يوميًا بنسبة ٤٫٩٥٪ لكنه مرتفع شهريًا بنسبة %٩٫٨٢

الدولار وصل لـ٤٧٫١ جنيه في البنك الأهلي المصري

١- سيدي كرير للبتروكيماويات - سيدبك أرباحها السنوية عن ٢٠٢٥ نزلت بنسبة ٥٥.٣٨٪ على أساس سنوي ووصلت لـ ١.١٣ مليار جنيه. إجمالي إيرادات الشركة في الفترة دي زاد حاجة بسيطة ووصل لـ ١٤.٤١ مليار جنيه بدل ١٤.١٥ مليار جنيه، وده معناه إن زيادة البيع ما قدرتش تغطي تكاليف التشغيل أو الضغوط المالية التانية اللي حصلت خلال السنة.جدير بالذكر إن قيمة سهم الشركة نزلت بنسبة ٦.٣٣٪ خلال السنة اللي فاتت

٢- شركة ممفيس للأدوية والصناعات الكيماوية  أرباحها في النصف الأول من السنة المالية زادت بنسبة ٥٪ على أساس سنوي ووصلت لـ ٢٨١٫٧٧ مليون جنيه. إجمالي إيرادات الشركة في الست شهور اللي خلصت في ديسمبر ٢٠٢٥ زادت بشكل ملحوظ ووصلت لـ ٩٥٥٫٥٢ مليون جنيه، بعد ما كانت ٧٨٧٫٩١ مليون جنيه في الفترة المقابلة من السنة المالية اللي قبلها. قيمة سهم الشركة طلعت بنسبة ١٤٪ إمبارح بعد أخبار النتائج دي، وده وصّل إجمالي مكاسب السهم خلال السنة اللي فاتت لـ ٪١٥٥

٣- شركة مصر لصناعة الكيماويات أرباحها في النصف الأول من السنة المالية نزلت بنسبة ١٠٪ على أساس سنوي ووصلت لـ ٢٨٢.٩٥ مليون جنيه. وبالرغم من التراجع ده في صافي الأرباح، إيرادات الشركة في الست شهور دول زادت ووصلت لـ ٥٥٦.٧٧ مليون جنيه، مقارنة بـ ٥٢٧.٩٦ مليون جنيه في نفس الفترة من السنة المالية اللي فاتت. ومن الجدير بالذكر إن قيمة سهم الشركة نزلت بنسبة ٣.٧٥٪ خلال السنة اللي فاتت

:أخبار غير متعلقة بالأرباح

١- بلتون لرأس المال المخاطر، التابعة لشركة بلتون القابضة، استحوذت على حصة استراتيجية في شركة ياكي المغربية المتخصصة في تكنولوجيا العقارات، وده كان جزء من جولة تمويلية بقيمة ١٥ مليون دولار. الخطوة دي بتأكد على توسع بلتون القوي في السوق المغربي، بعد ما استثمرت قبل كدة في براندات تانية هناك زي لنكو و فيلي فيلو

٢- شركة "بوسطة" للشحن بتخطط للطرح في البورصة المصرية قبل نهاية السنة، ومن المحتمل إنها تطرح حصة ما بين ٢٠ لـ ٣٠٪، بتقييم يوصل لـ ٨ مليار جنيه، حسب ما كتبت "الشرق "عن مصدر مطلع. الطرح ده، اللي هيعتبر أول إدراج لشركة متخصصة بس في خدمات التوصيل، بييجي بالتزامن مع جولة تمويلية بقيمة ٣٢ مليون دولار الشركة شغالة على إنها تخلصها. الخطوة دي بتدعم توقعات الطروحات لسنة ٢٠٢٦، اللي بتشمل طرح "جورميه" اللي شغال حالياً، والطروحات المتوقعة لشركة "العاصمة الإدارية" وعشر شركات تانية على الأقل. ومن الشركات المهمة اللي متوقع طرحها بداية من السنة دي هي بنك القاهرة وبنك الإسكندرية، حسب ما قالت مصادر لـ إنتربرايز قبل كدة

البورصة المصرية شافت حالة تباين حادة في شهر يناير سنة ٢٠٢٦. في الوقت اللي المؤشر الرئيسي فيه طار لمستويات قياسية، الأسهم الصغيرة والمتوسطة وعدد من الشركات واجهوا ضغوط هبوطية كبيرة

المؤشر الرئيسي (إيجي إكس ٣٠) حقق أداء استثنائي وقفز بنسبة ١٤.٢٤٪ وقفل عند ٤٧,٧٨٥.٩٣ نقطة. وفي المقابل، المؤشرات الأوسع نطاقاً كانت بتعاني

مؤشر الشركات الصغيرة والمتوسطة (إيجي إكس ٧٠) نزل بنسبة ٪٧.٤٣

مؤشر إيجي إكس ١٠٠ تراجع بنسبة ٪٣.٤٣

إجمالي رأس المال السوقي زاد بنسبة ٥.٣٢٪ خلال الشهر، ووصل لـ ٣.١٥٨.٥ مليار جنيه بنهاية الفترة. والنمو ده كان مدفوع بشكل كامل تقريباً بأسهم الشركات الكبيرة في المؤشر الرئيسي اللي قيمتها السوقية نطت بنسبة ٪١٢.٢

الأفضل أداءً: قطاع البنوك اتصدر كل الصناعات بزيادة ١٧.٤٪. وجه بعده قطاع خدمات تكنولوجيا المعلومات والاتصالات بنسبة ١٢.٨٪، وقطاع الموارد الأساسية بنسبة ٪٧.٨

الأكتر تراجعاً: قطاع الرعاية الصحية والأدوية شاف أكبر نزول بنسبة ٦.٢٪. وقطاع خدمات النقل والشحن واجه صعوبات ونزل بنسبة ٪٥.٥

الأسهم الأكثر ارتفاعاً

برايم القابضة للاستثمارات المالية: زادت بنسبة ٪٣٥.٢٢

مصرف أبوظبي الإسلامي - مصر: طلع بنسبة ٪٣١.١٠

البنك التجاري الدولي : زاد بنسبة ٪٣٠.١٠

راية القابضة للاستثمارات المالية: حققت مكاسب بنسبة ٪٢٩.٧٧

ماكرو للمستحضرات الطبية - ماكرو كابيتال: طلعت بنسبة ٪٢١.٠٥

الأسهم الأكثر انخفاضاً

أطلس للاستثمار والصناعات الغذائية: نزلت بنسبة ٪٤٤.٤١

العربية للأدوية والصناعات الكيماوية: نزلت بنسبة ٪٢٩.١٢

الكابلات الكهربائية المصرية: تراجعت بنسبة ٪٢٨.٦٢

العالمية للاستثمار والتنمية: هبطت بنسبة ٪٢٢.٦٥

سيدي كرير للبتروكيماويات - سيدبك: نقصت بنسبة ٪٢١.٣٨

إجمالي قيمة التداول في الشهر سجلت ٢,٠٨٧.١ مليار جنيه. ومع ذلك، السيولة فضلت متركزة بشكل ثقيل في أدوات الدخل الثابت

السندات والأذون: استحوذت على ٩٣.٦٦٪ من إجمالي القيمة المتداولة

الأسهم المقيدة: مثلت ٦.٣٤٪ بس من حركة التداول

توجهات المستثمرين: المصريين فضلوا هما القوة المسيطرة ومثّلوا ٨٥.٧٪ من قيمة تداول الأسهم. الأجانب سجلوا صافي شراء بدخول سيولة قيمتها ٣.٦٠٤.٥ مليار جنيه. والعرب سجلوا صافي بيع بقيمة ٥٠٥.٩ مليون جنيه، وده بعد استبعاد الصفقات في الأسهم المقيدة