صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: عدد النهاردة مش زي الأعداد التقليدية اللي متعودين عليها. النهاردة هنركز بالكامل على الأسباب والعوامل اللي خلت مؤشر البورصة الرئيسي ينط من رقم قياسي للتاني ويحقق مستويات تاريخية ورا بعض

مؤشر البورصة الرئيسي وصل لمستوى تاريخي امبارح حوالي الساعة ١١:٢٠ الصبح، لما لمس الـ ٤٦٠٠٠ نقطة، قبل ما يريح شوية ويقفل عند مستوى قياسي جديد وهو ٤٥٩٠٥ نقطة. الطلعة دي بتكمل القوة اللي بدأ بيها المؤشر من أول ٢٠٢٦، وبكده تكون أرباحه من بداية السنة قربت من الـ %١٠

إيه سبب الطلعة دي؟

الزيادة بتاعة امبارح كانت بسبب الأداء القوي لكذا سهم ثقيل في السوق. سهم "المصرية للاتصالات" نط ٨.٤٪، وبعده "إي فاينانس" اللي زاد ٧٪، ومصرف  "أبوظبي الإسلامي" اللي قفل على زيادة ٥.٣٪. الأرباح دي غطت وزيادة على تراجعات أسهم تانية زي "مصر للألومنيوم" اللي نزل ٢.٦٪، و"العربية للأسمنت" اللي هبط ١.٦٪، و"جهينة" اللي نزل %١.٤

وبعيداً عن الأسهم اللي طلعت امبارح، السوق بشكل عام لسه ساند على القوة المستمرة لـ البنك التجاري الدولي

تأثير البنك التجاري الدولي

سهم التجاري الدولي، اللي وزنه النسبي أكتر من ٣٢٪ في المؤشر، زاد بأكتر من ٢٣٪ من بداية السنة، وده بسبب الشراء القوي من الأجانب والمؤسسات. السهم قفل جلسة امبارح عند ١٢٦.٧ جنيه، وده بيأكد إنه موتور حقيقي لأداء البورصة

هل الطلعة دي هتكمل؟

مصدر بنكي قال لـ "الشرق" إن سهم التجاري الدولي بيتداول حالياً بمضاعف ربحية حوالي ٥.٥ مرة، وده رقم قليل جداً وأقل من قيمته الحقيقية. المصدر وضح إن لو قارناه ببنوك تانية كبيرة في أفريقيا، فالسعر العادل المفروض يكون بمضاعف ربحية قريب من ٩ مرات

مصدر تاني قال إن أرباح البنك القوية في سنة ٢٠٢٤، واللي وصلت لحوالي مليار دولار، بتخلي فكرة إن السهم لسه رخيص منطقية جداً. وعشان كده، المستثمرين بدأوا يقارنوا التجاري الدولي بالبنوك اللي في المنطقة مش بس بالسوق المحلي

الفترة الجاية، الكل هيبقى عينه على "استراتيجية الخمس سنين" اللي البنك هيعلن عنها، وأي أخبار عن توزيعات الأرباح، ودول هما اللي هيحددوا السهم رايح فين بعد كده

النهاردة

 القاهرة للخدمات التعليمية - معاد صرف كوبون بقيمة ١.٤٠ جنيه للسهم. وتاريخ الاستحقاق كان ١٨ يناير

٢٦ يناير ٢٠٢٦

 مصر للزيوت والصابون - معاد الاستحقاق لكوبون بقيمة ٠.٥٠ جنيه للسهم. والصرف هيكون ٢٩ يناير

٢٩ يناير ٢٠٢٦ 

مصر لصناعة الكيماويات - معاد صرف كوبون بقيمة ٢ جنيه للسهم. وتاريخ الاستحقاق كان ٣ نوفمبر

استنوا تحديثات جديدة يوم الاثنين