صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: أرباح "تعليم" تراجعت في الربع الأول، في الوقت اللي "إيديتا" استحوذت فيه على ملكية براندات "هوستس" في أفريقيا بالكامل، و"جنوب الوادي للأسمنت" بتتحرك لمضاعفة رأس مالها، والبورصة المصرية بتستعد لبدء تداول "المشتقات" في مارس

مؤشر إي جي إكس ٣٠ ارتفع بنسبة ١٫٣٨٪ وقفَل عند ٤٣٬٩٥٢ نقطة، مؤشر إي جي إكس ٧٠ ارتفع بنسبة ١٫٩٥٪ وقفَل عند ١٢٬٤٣٣ نقطة، ومؤشر إي جي إكس ١٠٠ ارتفع بنسبة ٢٫٠٣٪ وقفَل عند ١٦٬٧٦٨ نقطة

قيمة التداول وصلت لـ٢٫٨ مليار جنيه، من خلال ٩١٬٤٧٦ عملية على حوالي ٩٦٢٬٨١٥٬١٣٢ سهم

المستثمرين العرب كانوا الوحيدين اللي سجلوا صافي بيع

أبرز الأسهم الكسبانة في السوق كله: العربية لإدارة وتطوير الأصول (+١١٫٥٦٪)، مطاحن ومخابز جنوب القاهرة والجيزة (+٧٫٣١٪)، والقاهرة للزيوت والصابون (+٧٫١٩٪)

أما الخسرانة: جوجرين للاستثمار الزراعي (-٣٫٤٦٪)، عبر المحيطات للسياحه (-٣٫١٣٪)، وحق اكتتاب شركةكوبر للاستثمار التجاري والتطوير العقاري (-٢٫٧٣٪)

بالنسبة لمؤشر إي جي إكس ٣٠: أبرز الكسبانة كانت مصر للألومنيوم (+٦٫٦٪)، كريدي أجريكول (+٦٫٢٪)، وراية القابضة (+٦٫٢٪)

أما الخسرانة: المصرية للاتصالات (-٠٫٤٪)، وأوراسكوم للتنمية (-٠٫٤٪)

إحصائيات مهمة تانية

سعر جرام الذهب عيار ٢٤ وصل لـ٧٬١٤٦ جنيه، مرتفع يوميًا بنسبة ١٫٣٨٪ ومرتفع شهريًا بنسبة ٪٧٫٩٣

الدولار وصل لـ٤٧٫٣٣ جنيه في البنك الأهلي المصري

١- شركة "تعليم" حققت أرباح ٢٩٧ مليون جنيه في الربع الأول، بتراجع بسيط (٠.٦٪) رغم إن إيراداتها زادت بنسبة ٤٧٪ ووصلت لـ ٨٦٩ مليون جنيه بفضل زيادة أعداد الطلاب (اقرا أكتر في قسم نظرة معمقة)

٢- شركة "إيديتا" بقت رسمياً هي المالكة الوحيدة لبراندات "هوستس براندز" في كل قارة أفريقيا، بعد ما اشترت حقوق الملكية لـ ٤٥ دولة جديدة. الخطوة دي هتوفر على الشركة مبالغ كبيرة كانت بتدفعها كـ "عمولات ملكية"، وهتساعدها توصل لهدف مبيعاتها اللي هو ٢٦ مليار جنيه، ده غير إنها بتعتبر وسيلة لتوفير العملة الصعبة من خلال التصدير، حسب ما قال مدير علاقات المستثمرين والاستثمارات  في الشركة عمر الأبحر لإنتربرايز. جدير بالذكر إن قيمة سهم الشركة زادت بنسبة ٩٧% في أخر سنة

٣- شركة "جنوب الوادي للأسمنت" قررت تضاعف رأس مالها المصدر لـ ٤٫٨ مليار جنيه عن طريق اكتتاب قدامى المساهمين، وده عشان تقوي مركزها المالي وتدعم خطط نموها الجاية. وبعد ما سهم الشركة حقق طفرة وزاد بنسبة ١٣٣٪% خلال السنة اللي فاتت، الشركة دلوقتي بتعين مكتب "بي دي أو" عشان يعمل دراسة "قيمة عادلة" قبل ما يتم التصويت النهائي من المساهمين على زيادة رأس المال

٤- البورصة المصرية قربت تبدأ تداول "المشتقات المالية" في شهر مارس الجاي، بعد ما خدت الترخيص الرسمي من هيئة الرقابة المالية. البداية هتكون بـ "عقود المستقبل" لمؤشر إي جي إكس ٣٠، وفي ٧ شركات سمسرة جاهزة فعلاً للبدء بمجرد ما يخلص الربط التقني خلال الأسابيع الجاية

١- مصر بتتحرك لإنشاء مصفاة ذهب معتمدة عالميًا بنظام الشراكة بين القطاع العام والخاص، والهدف هو تحويل مصر من مجرد مُصدر للذهب الخام لمركز بيقوم بتكريره محلياً بمواصفات عالمية. المشروع ده متخطط له عشان يخلي السوق رسمي، ويقضي على التجارة غير القانونية، ويدعم جهود البنك المركزي في تقوية احتياطيات الذهب الرسمية

٢- مصر بتجهز عشان تطرح أول مناقصة عالمية للتنقيب عن البترول في منطقة "غرب أسيوط" في الربع التاني من السنة دي، وده بمجرد ما تخلص أعمال المسح السيزمي، حسب تصريحات مسؤول حكومي لـ "اقتصاد الشرق". المزايدة هتكون بنظام "اقتسام الأرباح" المخصص للمناطق الجديدة ، وده ضمن محاولات الحكومة لجذب الاستثمارات الأجنبية، وزيادة الإنتاج، ووضع صعيد مصر بقوة على خريطة استثمارات البترول والغاز. الخطوة دي هدفها إن الدولة تقلل الفجوة بين إنتاج مصر من الغاز اللي واصل لـ ٤٫٢ مليار قدم مكعب يومياً، وحجم الاستهلاك اللي بيوصل لـ ٦٫٢ مليار

أعلنت شركة تعليم لخدمات الإدارة عن تحقيق صافي ربح بقيمة ٢٩٧ مليون جنيه عن الربع الأول من السنة المالية ٢٠٢٥/٢٠٢٦ (الفترة المنتهية في ٣٠ نوفمبر ٢٠٢٥)، وده بيمثل تراجع بسيط بنسبة ٠٫٦٪ مقارنة بـنفس الفترة السنة اللي فاتت. في المقابل، إيرادات الشركة نطت بنسبة ٤٧٪ عشان توصل لـ ٨٦٩ مليون جنيه، والزيادة دي كانت مدفوعة بزيادة إجمالي عدد الطلاب بنسبة ٢٨٪ وزيادة أعداد المقبولين في العام الدراسي الحالي.

إجمالي عدد الطلاب المسجلين في الشركة وصل لـ ١٥٬٦٨١ طالب، وده بدعم من زيادة قوية بنسبة ٣١٪ في عدد الطلاب الجدد اللي وصل لـ ٥٬٣٥٩ طالب. حالياً، شركة "تعليم" بتدير 3 جامعات هي: جامعة النهضة في بني سويف، وجامعة بادية، وجامعة ممفيس اللي تم افتتاحها مؤخراً؛ وبكده الشركة بقى عندها إجمالي ٢٢ كلية مرخصة، وطاقة استيعابية مجمعة بتوصل لـ ٣٢٬٥٥٠ طالب.

افتتاح جامعة ممفيس في شرق القاهرة ساعد الشركة إنها توسع نطاق تواجدها عشان يغطي شرق القاهرة، وغرب القاهرة، وصعيد مصر. كمان جامعة النهضة حصلت على موافقات لإنشاء كليات "التمريض" و"العلوم الطبية"، وده بيكمل خطة الشركة للتوسع في قطاع التعليم الطبي.

الشركة استثمرت ٣٨٥ مليون جنيه في الإنفاق الرأسمالي خلال الربع ده، وخصصت ٩٧٪ من المبالغ دي لمشاريع النمو. أهم المشاريع اللي الشركة مركزة عليها هي تطوير مستشفى جامعة النهضة، وزيادة الطاقة الاستيعابية في جامعتي باديا وممفيس. الإدارة وضحت إن التدفقات النقدية من العمليات التشغيلية زادت بنسبة ٣٣٪ ووصلت لـ ٤١٦ مليون جنيه، وده اللي بيسند استثمارات الشركة المستمرة في الجوانب الأكاديمية والإنشائية.

 شركة "بالم هيلز" استحوذت على حصة ٣٢٫٦٪ في "تعليم" في نهاية ٢٠٢٤، وبقت هي أكبر مساهم في الشركة

قيمة سهم شركة تعليم زادت بنسبة ٤٥٪ خلال السنة اللي فاتت

خلصنا جولتنا في السوق النهارده

استنوا التحديثات الجديدة بكرة