صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: دايس وقعت شراكة تصنيع مع مستثمرين إيطاليين، وبالم هيلز قفلت إصدار سندات توريق بـ ٢ مليار جنيه، و بنك تنمية الصادرات أنهى تخارجه من أصول سياحية بـ ٣٫٨ مليار جنيه؛ في نفس الوقت ممفيس للأدوية بتدرس خطط استثمارية جديدة، واكتتاب جورميه سجل تغطية قوية تمهيداً لبداية التداول

مؤشر إي جي إكس ٣٠ ارتفع بنسبة ١٫٣٣٪ وقفَل عند ٤٩٬٦٣١ نقطة، مؤشر إي جي إكس ٧٠ ارتفع بنسبة ٠٫٦١٪ وقفَل عند ١٢٬٧٨٨ نقطة، ومؤشر إي جي إكس ١٠٠ ارتفع بنسبة ٠٫٧٣٪ وقفَل عند ١٧٬٦٨١ نقطة

قيمة التداول وصلت لـ٨٫٨ مليار جنيه، من خلال ١٦٨٬٥٦١ عملية على حوالي ٢٬٩٥٦٬٩٢٣٬٩٤٧ سهم

المستثمرين الأجانب كانوا الوحيدين اللي سجلوا صافي شراء

أبرز الأسهم الكسبانة في السوق كله: المصرية للدواجن (+١٩٫٩٥٪)، جوجرين للاستثمار الزراعي (+١٠٫٤١٪)، والنيل للأدوية والصناعات الكيماوية (+٨٫١٢٪)

أما الخسرانة: مصر للزيوت والصابون (-٦٫٦٢٪)، الصناعات الهندسية المعمارية للانشاء والتعمير - ايكون (-٤٫٠٤٪)، وتعليم لخدمات الإدارة (-٣٫٤٦٪)

بالنسبة لمؤشر إي جي إكس ٣٠: أبرز الكسبانة كانت ابن سينا فارما (+٧٫٢٪)، كيما (+٥٫٠٪)، وجهينة (+٣٫٣٪)

أما الخسرانة: بالم هيلز (-٢٫١٪)، أبو قير للأسمدة (-١٫٧٪)، ومصر الجديدة للإسكان والتعمير (-١٫٤٪)

إحصائيات مهمة تانية

سعر جرام الذهب عيار ٢٤ وصل لـ٧٬٥٣٢ جنيه، منخفض يوميًا بنسبة ١٫٨٠٪ لكنه مرتفع شهريًا بنسبة ٪١٠٫٣٦

الدولار وصل لـ٤٦٫٨٩ جنيه في البنك الأهلي المصري

١- شركة دايس أعلنت عن شراكة مع شركتين من إيطاليا عشان يأسسوا شركة جديدة لتصنيع الملابس الجاهزة، وده حسب بيان بعتوه للبورصة المصرية. الخطوة دي بتيجي تماشياً مع خطة العيلة المؤسسة للشركة اللي أعلنوها لما رجعوا استحوذوا على حصة الأغلبية في ٢٠٢٣، وكان هدفهم وقتها يزودوا التصدير ويدخلوا أسواق جديدة في المنطقة

٢- المطور العقاري بالم هيلز قفل بنجاح إصدار سندات توريق بقيمة ٢ مليار جنيه. وده يعتبر أول إصدار ضمن برنامج التوريق الجديد بتاعهم اللي قيمته الإجمالية ٣٠ مليار جنيه، حسب بيان مشترك طلعوه مع "إي إف چي هيرميس". الإصدار اتقسم على أربع شرائح بآجال استحقاق بتبدأ من ١٣ شهر وبتوصل لحد ٨٤ شهر، وتصنيفات ائتمانية بتتراوح بين اي اى+ واى-

٣- البنك المصري لتنمية الصادرات خلص بيع أصوله السياحية بقيمة ٣٫٨ مليار جنيه وأكد إنه استلم المبلغ بالكامل، حسب إفصاح للبورصة. التخارج ده تم عن طريق شركاته إيجيبت كابيتال القابضة  والمصري للاستثمارات العقارية، اللي باعوا كل حصصهم في شركتي تنمية السياحة المصرية والاستثمارات السياحية بسهل حشيش

٤- شركة ممفيس للأدوية بتدرس حالياً عروض لبيع قطعة أرض مساحتها ٢٤٢٧ متر، وفي نفس الوقت بتبحث شراء خطوط إنتاج جديدة للأمبولات والمراهم باستثمارات ٢٨٨ مليون جنيه. الشركة أكدت في بيان للبورصة إن الخطوات دي لسه مجرد "خطط ودراسات" ومفيش أي قرارات نهائية اتاخدت لحد دلوقتي.

خبر عن طرح جورميه

الطرح العام لأسهم جورميه شاف إقبال ضخم واتغطى تقريباً ٥٥.٨ مرة، وتم تحديد السعر النهائي للسهم عند ٦.٩ جنيه بعد ما الطرح الخاص كمان حقق نجاح كبير. الشركة بتستهدف جمع حوالي ١.٣ مليار جنيه مقابل بيع ٤٧.٦٪ من أسهمها، ومن المقرر بدء التداول في البورصة يوم الاثنين الجاي

١- مسؤول حكومي قال في مقابلة مع "إنتربرايز" إن وزارة المالية والبورصة بيجهزوا لتفعيل سوق ثانوي للصكوك السيادية عشان يرفعوا العوائد ويجذبوا سيولة جديدة، مع خطط لطرح صكوك بفايدة متغيرة وسندات للأفراد في النصف الأول من ٢٠٢٦. المسؤول أكد كمان إن مصر ناوية ترجع لسوق السندات الدولية وتجمع ما بين ٢ و ٢.٣ مليار دولار الفترة الجاية، بعد ما أجلوا طرح فبراير عشان يستنوا ظروف السوق تتحسن

٢- مصر بتخطط تزود عدد الغرف الفندقية في الساحل ما بين ٢٠ و٣٠ ألف غرفة لحد سنة ٢٠٣٠ عشان تستفيد من انتعاشة السياحة، وده حسب تصريحات مسؤول حكومي لـ"الشرق". الخطة دي جاية بعد سنة قوية زار مصر فيها ١٩ مليون سائح وحققنا إيرادات قربت من الـ ٢٤ مليار دولار، والحكومة بتدعم التوسع ده بتمويلات ميسرة عشان تسرع وتيرة البناء هناك