صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: أرباح كيما وزهراء المعادي وأموك سجلت نمو ملحوظ، في نفس الوقت كشفت مجموعة الجارحي عن خطتها انها تبقى أكبر مساهم في إي إف جي

مؤشر إي جي إكس ٣٠ نزل بنسبة ٠٫١٠٪ وقفَل عند ٤٧٬٧٨٥ نقطة، مؤشر إي جي إكس ٧٠ نزل بنسبة ٢٫٨٥٪ وقفَل عند ١٢٬١٤٩ نقطة، ومؤشر إي جي إكس ١٠٠ نزل بنسبة ٢٫٠٨٪ وقفَل عند ١٦٬٨٢٧ نقطة

قيمة التداول وصلت لـ٧٫٥ مليار جنيه، من خلال ١٥٨٬٧٥٦ عملية على حوالي ١٬٩٦٠٬١٨٩٬١٥٦ سهم

المستثمرين الأجانب كانوا الوحيدين اللي سجلوا صافي شراء

أبرز الأسهم الكسبانة في السوق كله: جوجرين للاستثمار الزراعي (+١٩٫٣٤٪)، الوادي العالمية للاستثمار والتنمية (+٤٫٦٧٪)، والمصرية لنظم التعليم الحديثة (+٢٫٦٣٪)

أما الخسرانة: العبور للاستثمار العقاري (-١٠٫٤٤٪)، المتحدة للإسكان والتعمير (-٩٫١٣٪)، والكابلات الكهربائية المصرية (-٨٫٦٤٪)

بالنسبة لمؤشر إي جي إكس ٣٠: أبرز الكسبانة كانت كريدي أجريكول (+٢٫٦٪)، الشرقية ايسترن كومباني(+٢٫٢٪)، ومدينة مصر (+١٫٩٪)

أما الخسرانة: مصر للالومنيوم (-٣٫٧٪)، ابن سينا فارما (-٢٫٩٪)، وراميدا (-٢٫٥٪)

إحصائيات مهمة تانية

سعر جرام الذهب عيار ٢٤ وصل لـ٧٬٨٠٦ جنيه، منخفض يوميًا بنسبة ٣٫١٧٪ لكنه مرتفع شهريًا بنسبة ٪١٤٫٨٨

الدولار وصل لـ٤٦٫٨٨ جنيه في البنك الأهلي المصري

١- أرباح شركة الصناعات الكيماوية المصرية - كيما في النصف الأول من السنة قفزت بنسبة ٤٧٪ على أساس سنوي ووصلت لـ ١.١٩ مليار جنيه، وده كان مدفوع بزيادة المبيعات ومكاسب فروق العملة الكبيرة. إيرادات النشاط كمان طلعت لـ ٤.١٥ مليار جنيه بعد ما كانت ٣.٩٧ مليار جنيه. قيمة سهم الشركة زادت بنسبة ٢٧٪ خلال السنة اللي فاتت

٢- أرباح زهراء المعادي في ٢٠٢٥ قفزت بنسبة ٣٤.٦٪ ووصلت لـ ٧١٢.٣ مليون جنيه، وده بفضل زيادة مبيعاتها لـ ٨١٢.٢ مليون جنيه بعد ما كانت ٧٦١.٥ مليون في ٢٠٢٤. وبعد النتائج القوية، الشركة اقترحت توزيع أرباح نقدية على المساهمين بقيمة ٢٠٠ مليون جنيه ( ٢٠ قرش لكل سهم). جدير بالذكر إن سعر سهم الشركة زاد بنسبة ٥٥٪ خلال السنة اللي فاتت

٣-أرباح الإسكندرية للزيوت المعدنية (أموك) زادت ٢٪  على أساس سنوي خلال النصف الأول من السنة المالية الجارية، ووصلت لـ ٦٥٦.٤ مليون جنيه. المبيعات وصلت لـ ٢٠.٧ مليار جنيه بعد ما كانت ١٨.٢٤ مليار جنيه. "أموك" حاطة هدف إنها تحقق صافي ربح ١.٠٢ مليار جنيه في السنة المالية ٢٠٢٦. قيمة سهم الشركة نزلت فيه ١٢٪ خلال السنة اللي فاتت

أخبار غير متعلقة بالأرباح

١- مجموعة الجارحي للاستثمار والتطوير" بتخطط ترفع حصتها في شركة إي إف جي القابضة لـ ١٥٪ كمرحلة أولى، بعد ما حصتها وصلت حالياً لـ ١٠.١٪، بحسب تصريحات محمد الجارحي، نائب رئيس المجموعة لـ "الشرق". الخطوة دي هتحول مجموعة الجارحي من تاني أكبر مساهم في إي إف جي لـ أكبر مساهم في الشركة، والمجموعة ممكن تفكر إنها تطلب تمثيل في مجلس الإدارة. الخطوة ده جاية بعد ما سهم إي إف جي زاد بأكتر من ٣٣٪ خلال السنة اللي فاتت

٢- شركة جورميه حددت سعر سهمها النهائي في البورصة بـ ٦.٩٠ جنيه، وده أعلى سعر في النطاق اللي كان متحدد، بعد ما الطلب في الطرح الخاص غطى الكمية المطلوبة ١٢.٢ مرة. قيمة الشركة السوقية وصلت لـ ٢.٧٦ مليار جنيه، ومن المتوقع يبدأ التداول على سهمها يوم ٩ فبراير الجاي. باب الاشتراك لسه مفتوح للأفراد لحد يوم الأربعاء، لكن إشتراك المؤسسات إنتهى يوم الخميس اللي فات

١- مصر ممكن تأجل خطتها لجمع ما بين ١.٥ لـ ٢ مليار دولار من سندات يوروبوندز الشهر ده بسبب عدم استقرار الأسواق العالمية، حسب ما قال مسؤول حكومي لـ انتربرايز. وزارة المالية قلقانة من تذبذب الدولار ووصول الذهب لمستويات قياسية، وشايفة إن الانتظار أحسن عشان تتجنب تكلفة اقتراض عالية

٢- أعلنت وزارة المالية عن فائض أولي وصل لـ ٣٨٢.٨ مليار جنيه في أول ٦ شهور من السنة المالية الحالية، وده بفضل زيادة الحصيلة الضريبية بنسبة ٣٢٪. رغم كده، العجز الكلي في الموازنة  وصل لـ ٤.٢٪ من الناتج المحلي، نتيجة لزيادة الإنفاق العام لـ ٢.٢ تريليون جنيه