صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: أرباح قطر الوطني وصلت ٣٠ مليار جنيه وقطاع مواد البناء تصدر مكاسب البورصة بنمو ٢٣٨٪ في ٢٠٢٥، في الوقت اللي أكرو مصر قدمت فيه رسميًا طلب الشطب، ومصرف أبو ظبي الإسلامي خلص زيادة رأسماله بتغطية وصلت لـ ٩٦.٨ مرة

مؤشر إي جي إكس ٣٠ نزل بنسبة ١٫٤٣٪ وقفَل عند ٤٣٬٠٥٨ نقطة، مؤشر إي جي إكس ٧٠ نزل بنسبة ٢٫٤٤٪ وقفَل عند ١٢٬٣٩٦ نقطة، ومؤشر إي جي إكس ١٠٠ نزل بنسبة ٢٫٠٩٪ وقفَل عند ١٦٬٦٤٨ نقطة

قيمة التداول وصلت لـ٤٫٧ مليار جنيه، من خلال ١٣٦٬٣٢٤ عملية على حوالي ١٬٧٥٢٬٠٨٩٬٢١٠ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: الإسكندرية للغزل والنسيج (+٥٫٨٣٪)، حق اكتتاب شركة اطلس للاستثمار والصناعات الغذائية (+٥٫٦٣٪)، والعربية للمحابس (+٥٫٢٢٪)

أما الخسرانة: العالمية للاستثمار والتنمية (-٧٫١٩٪)، ارابيا للاستثمار والتنمية (-٧٫١٩٪)، وسماد مصر(-٦٫٣٤٪)

بالنسبة لمؤشر إي جي إكس ٣٠: أبرز الكسبانة كانت إي فاينانس (+٣٫٧٪)، فالمور القابضة – دولار (+٠٫٩٪)، وبالم هيلز (+٠٫٥٪)

أما الخسرانة: بلتون القابضة (-٤٫١٪)، مصر للأسمنت (-٤٫٠٪)، وجهينة (-٣٫٧٪)

إحصائيات مهمة تانية

سعر جرام الذهب عيار ٢٤ وصل لـ٧٬٠٤١ جنيه، منخفض يوميًا بنسبة ٠٫٩٦٪ ومرتفع شهريًا بنسبة ٪٦٫٨٦

الدولار وصل لـ٤٧٫٢٧ جنيه في البنك الأهلي المصري

١- بنك قطر الوطني الأهلي حقق أرباح مجمعة وصلت لـ ٣٠.٠٦٥ مليار جنيه في ٢٠٢٥، بنمو ١٣.٦٪ مقارنة بـ ٢٦.٤٦٢ مليار جنيه في ٢٠٢٤. الزيادة دي جت بدفع من صافي الدخل من العائد اللي ارتفع لـ ٤٩.٤٣ مليار جنيه (مقابل ٤١.١١ مليار) وصعود الدخل من الأتعاب والعمولات لـ ٦.٢ مليار جنيه (مقابل ٥.٦ مليار).

٢- قطاع مواد البناء في مصر حقق أفضل نمو في البورصة خلال ٢٠٢٥، وحقق مكاسب قوية تجاوزت ٢٣٨٪. خبراء في السوق وضحوا لـ "الشرق" إن الطفرة دي كانت نتيجة انتعاش حركة التشييد وزيادة الصادرات لمستويات غير مسبوقة. الأداء ده انعكس على أداء الشركات المدرجة بشكل ملحوظ؛ سهم مصر للأسمنت-قنا ارتفع بنسبة ٦٣٩٪، وسهم مصر بني سويف للأسمنت زاد بنسبة ٣٨٦٪، والعربية للأسمنت سجل صعود بنسبة ١٩٤٪، وسهم أسمنت سيناء زاد بنسبة ٪١٢٥

٣- شركة أكرو مصر قدمت رسميًا طلب لشطب أسهمها اختياريًا من البورصة المصرية، وده بعد ما أخدت موافقة الجمعية العمومية، بحسب بيان البورصة. الموضوع بدأ من قرار مجلس الإدارة في ديسمبر اللي فات، واللي حدد سعر شراء أسهم المساهمين الراغبين في الخروج بـ ١٢٩.٢٩ جنيه للسهم، وده طبعًا أعلى من الحد الأقصى اللي كان محطوط قبل كده بـ ١٠٠ جنيه للسهم لتمويل عملية الشراء

٤- مصرف أبو ظبي الإسلامي - مصر أعلن إن المرحلة التانية من زيادة رأس المال اتغطت ٩٦.٨ مرة، ووصل حجم الاكتتاب لأكتر من ٤٢٢ مليون سهم. البنك هيوزع الأسهم بنسبة تخصيص حوالي ٠.٠١٠٣٣ لكل سهم، وهيرجع المبالغ الزيادة للمساهمين خلال أسبوع

١- وزارة المالية بتخطط تطرح سندات دولية "يورو بوندز" بقيمة تتراوح بين مليار و ١.٥ مليار دولار ممكن يكون الشهر ده، بحسب تصريحات مسؤول حكومي لـ انتربرايز. الحكومة عايزة تستغل تراجع تكلفة الاقتراض ووصول علاوة المخاطر لأقل مستوياتها من ٦ سنين، وفي خطة كمان لطرح سندات "ساموراي خضراء" بـ ٥٠٠ مليون دولار قبل نهاية يونيو عشان تنوع مصادر التمويل بالتزامن مع السيولة المتوقعة من الاتحاد الأوروبي وصندوق النقد

٢- البنك الدولي ثبت توقعاته لنمو الناتج المحلي الإجمالي لمصر عند ٤.٣٪ في السنة المالية ٢٠٢٥-٢٠٢٦، وشايف إن التعافي بدأ يظهر فعلياً مع تراجع قيود الاستيراد وتوفر العملة الصعبة. التقرير وضح إن التوجه لتمكين القطاع الخاص هيوصل بنمو الناتج المحلي لـ ٤.٨٪ السنة اللي بعدها، لكنه حذر من إن التوترات الإقليمية أو أي تغيير مفاجئ في شهية المستثمرين لسه بيمثلوا خطر على استقرار الوضع

خلصنا جولتنا في السوق النهارده

استنوا التحديثات الجديدة بكرة